Shillong, Ïaïong 25
Ka Youth Development Committee jong ka MFA ka la rai ban pynlong shwa da ka jurip rta jong ki khynnah ïalehkai shynrang shwa ban sdang ka lympung ïalehkai Meghalaya Youth League kaba kynthup ïa ka Under-13 bad ka Under-15.
Ïa kane jurip rta yn pynlong ha ka 4 tarik u Jymmang ha nongbah Shillong, Mairang, Jowai bad ha Tura shwa ban pynlong ïa kane ka lympung ha la ki jong ki zone kiba kynthup ïa ka East Khasi Hills, West Khasi Hills, Jaiñtia Hills bad Garo Hills.
“Ka jingjurip rta ha Shillong kan dei na ka bynta ki khynnah jong ka East Khasi Hills, ha Mairang kan dei ïa kiba na West, South West bad Eastern West Khasi Hills. Ha Jowai kan dei ïa kiba na East bad West Jaiñtia Hills bad ha Tura kan dei na ka bynta ki khynnah kiba na baroh ki district jong ka Garo Hills,” la pynpaw u General Secretary u Bah Sunesh Syiem haba ïakren bad ki nongthoh khubor ha ka sngi Ba-ar.
“Ïa mynta ngim pat lah ban rai lano ngin pynlong ïa ka Meghalaya Youth League namar ngin hap ban shong jingïalang para dkhot na ka bynta ban ïapyrkhat lang ba kane ka lympung kam dei ban pynthut ïa ki khynnah kiba dang-don hapdeng ka jingleit skul,” la bynrap da kaba ong ba kum ka Youth Development Committee kan hap ban long phikir bha ïa ka rukom shna ïa ka prokram ïalehkai khnang ba kan ym ktah ïa ka jingpule ki khynnah.
Wat la ki don kumba 21 tylli ki synjuk ïalehkai kiba la pynïasoh sha ka MFA, hynrei ym pat lah ban pynthikna haduh katno tylli ki ban ïashim bynta ha ka Youth League
Ha kawei pat ka liang u Bah Syiem u la ïathuh ba ka jingpynlong ïa kane ka Youth League ka long ban sei ïa ki khynnah kiba kynsai ki ban mihkhmat ïa ka Jylla sha ki lympung ïalehkai (Junior & Sub-Junior) ki ban pynlong da ka AIFF. “Kam long kaba ïahap ba ngin shu jied ïa ki khynnah ba kin mihkhmat ïa ka Jylla, hynrei lyngba kane ka lympung ïalehkai Youth League kan long ka jingïarap ïa ka Youth Development Committee ba kan sei ïa ki khynnah kiba kynsai ki ban khlaiñ ka ban mihkhmat ïa ka Jylla,” la bynrap u Bah Sunesh.
