Doha, Iaïong:
Ha ka sien nyngkong ka Russia bad Ukraine ki la mynjur ban pyllait markylliang ia kito ki khynnah kiba la shu sakma naduh ba khie ka thma hapdeng ka Russia bad Ukraine. Kane ka long hadien ka jingpyn-iakren ka Qatar ban pynbeit ia ki kam-ki jam hapdeng kitei arliang ri ki bym lah shuh ban ïasuk ne sangeh noh ia ka thma. Ia kane ka khubor la pynbna da ka Myntri jong ka tnat ba dei khmih ia ki khynnah hapoh Doha ha ka Sngi Balang.
Namar la ong ba ka Russia ka la rah naphang ia ki khynnah na Ukraine shapoh u pud- u sam lade hapdeng ka jingleit hiar thma sha Ukraine. Namar kata, katei ka nongialam ka la dawa ia ka International Criminal Court (ICC) ba ka dei ban pynshitom bad ai jingsneng ne pynngat kyndon ia ka Russia namar katei ka jingleh be-aiñ jong ka pyrshah ia ki riew paidbah bad ki mynsiem ba lui-lui jong ka Ukraine naduh ba sdang ka thma.
Kumta, la ong ba ha ka sien ba nyngkong, ka Russia ka la mynjur lang bad ka Ukraine ban iapyllait noh markylliang ia kitei ki khynnah ha kaba yn sdang da kaba pyllait shuwa ia 29 ngut ki khynnah sha Ukraine bad ka Ukraine pat kan pyllait ia 19 ngut ki khynnah jong ka Russia kum ka jing ia pyllait markylliang katkum ba la ia mynjur ha katei ka jingiakut.
Wat la katta, la ong ba katei ka nongialam kam shym la pynpaw pat ia ka daw ba balei kitei ki khynnah ki la leit poi sha Russia, ha kano ka dur bad naduh kano ka por ruh hynrei la shu bna ia ki khubor ba ka Ukraine ka pharep ia ka Russia ba ka la rahbor naphang ia ki khynnah na Ukraine ban pynrung jubor sha Russia.
Ka Ukraine ka la buh jingkheiñ antad ruh ba ka Russia da kumno- kumno ka la rah ia palat 19,000 tam ki khynnah na Ukraine naduh ba sdang ka thma ha u Risaw jong u snem 2022. Bad napdeng jong kitei ki hajar ngut kiba shah rahbor sha Russia, tang kumba 400 tam kiba la wan phai ne wan poi biang sha Ukraine, katba kiba bun pat ki dang sahkut hi hapoh ka kti jingsynshar jong ka Russia.
Katba, na ka liang ka Russia pat ka la kyntait ia katei ka jingkynnoh jong ka Ukraine bad ong ba ka Russia kam shym la rahbor ia kitei ki khynnah hynrei ka shu rah ban pynkynriah ia ki na kitei ki bynta ki bym shngaiñ jong ka Ukraine bad ka la leit pynpoi ia ki sha ki bynta kiba shngaiñ bad ban ym shah ktah na ka jingiakhun thma jong ka Russia bad Ukraine.
