Kabul, Iaiong:
Ka sorkar Taliban kaba synshar hi ia ka ri Afghanistan, ha kane ka kynti la ong ba ha ka sien ba nyngkong eh ka la ïashim bynta ha ka jingiakren bad ka United Nations ban ialeh pyrshah bad ban tehlakam ia ki jingeh jong ka jingkylla ka suiñ bneng hapoh Afghanistan.
Hadien 40 snem hadien jong ka thma ha katei ka ri, la ong ba ka Afghanistan ka la wan ha ka kyrdan ba nyngkong jong kiwei pat ki ri kiba synshar hi da ki lehnoh bad kaba la mih shakhmat ban pyrkhat naka bynta ka bha- ka miat jong ka pyrthei baroh kawei bad ban ialeh pyrshah ruh ia ka jingkylla ka suiñ bneng ha kine ki sngi.
Watla katta, la ong ba ka Afghanistan naduh u snem 2021 hi ba ka la hap hapoh ka bor synshar jong ka Taliban, ka la duh noh ia ki lad jingiarap kiba bun ba katei ka ri ka dei ban ioh na ki tnat bapher jong ka pyrthei naka bynta ban pynbit- pynbiang ia ka jinglong jingman hapoh katei ka ri. Hynrei namar ka jing bym shngaiñ ka jinglong- jingman hapoh Afghanistan naduh ba la synshar hi da ka Taliban, kiba bun ki tnat ki la sangeh noh ban leit ai jingiarap namar kim nud ban leit rung bad kim nud ruh ban pyniadei kam bad ka Taliban ha katei ka ri.
Ia katei ka jingialang ban ia pyrkhat kam halor ka jingkylla ka suiñ bneng, la lam khmat da ka Norwegian Afghanistan Committee (NAC) bad katei ka jingiakren ka la kut noh ha ka Sngi Ba-ar, la iathuh u Director jong katei ka ri- u Terje Watterdal ha ki lad pathai khbur ha katei hi ka sngi.
