Nongstoiñ, Ïaïong 26
Ka lympung ïalehkai 29th District Level Inter School Athletic Meet 2024 ba la pynlong da ka shlem trei kam jong ka District Sports Officer (DSO) West Khasi Hills ka la poi noh sha kaba kut ha ka sngi Thohdieng ha kaba ka skul Sibsing Memorial Govt. HSS ka la rah ïa ka nam kum ka lahduh hadien ba ka la ïoh ban khur haduh 12 tylli ki takma ksiar, 8 tylli ki takma rupa bad 8 tylli ki takma rynong napdeng kiwei pat ki skul kiba la wan ban ïashim bynta.
Ïa ka nam ba-ar ha kane ka lympung kaba la neh lai sngi lynter, la khur da ka St. Peter Higher Secondary School hadien ba ka la ïoh 11 tylli ki takma ksiar, 15 ki takma rupa bad 10 tylli ki takma rynong. Ïa ka nam balai la ïoh ban khur da ka Mawrang Secondary School kaba la khur 5 tylli ki takma ksiar, 3 ki takma rupa bad kawei ka takma rynong.
Nangta, ïa ka nam Best Team ha ka Under-14 la ïoh ban khur da ka St. Peter’s HSS ha ka liang ki shynrang bad ka Dapboklang Giri Memo-rial SS ha ka liang ki kynthei. Ha ka Under-16 la khur biang da ka St. Peter’s HSS ha ka liang ki shynrang bad ka St. Francis D.Assisi HSS ha ka liang ki kynthei. Shuh shuh ïa kajuh kane ka nam ha ki Under-18 la khur da ka Sibsingh Memorial Govt. HSS ha ka liang ki shynrang bad ka Mawrang Secondary School ha ka liang ki kynthei.
Haba phai pat sha ka nam Best Athlete la ïoh ban khur da u Alvil Khar-bani na ka St Peter’s HSS bad ka Phibanrishisha Rashir na ka Rongrin RMSA Hr. Sec School. Ha ka Under-16 la ïoh ban khur da u Filberstone Snaitang na ka Sibsingh Memorial Govt. HSS bad ka Bakyntihun Jyndiang na Jawaha Navo Secondary School. Ha ka Under-18 Boys la ïoh ban khur da u Pynshai Manik Kharbani na ka Sibsingh Memorial Govt. HSS bad ka Ioris Syiem na ka Mawrang Secondary School.
Ha ka jingïakop ïaid March Past ïa ka nam jop la khur da ka Anderson HSS, bad ïa ka kyrdan ba-ar la khur da ka Mount Hermon Academy Secondary School.
Lah ban kadew hangne ba ha kane ka lympung mynta u snem ki don haduh 25 tylli ki skul kiba la wan ban ïashim bynta, bad ki don haduh 921 ngut ki nongïalehkai. Ha kane ka sngi pynkut la ïadon lang u Bah P. B. War Nongbri, Assistant Director ka tnat ïalehkai ka Sorkar Jylla kum u kongsan ha ka jingïadon lang ruh ka DSO jong ka West Khasi Hills ka Kong Balarina Syiem bad kiwei kiwei kiba la sam ruh ïa ki khusnam sha ki nongjop.
