Shillong, Nailur 07
Ka kynhun jong ka North East Sports Association (NESA), hapoh ka jingïalam jong U Bah John F. Kharshiing, Working President ka Meghalaya State Olympic Association bad Secretary General ka NESA, ka la ïakynduh bad Dr. Joram Aniya, kaba long ka dkhot jong ka NITI Aayog, ha ka nongbah Delhi ban ïakren halor ka roi ka par jong ki tnat ïalehkai ha ka thaiñ shatei lammihngi.
Ha kane ka jingïakynduh kaba la neh kumba shi kynta, ka kynhun ka la ïasam ïa ki jingbishar bniah bad ki jingïohsngew na ki jylla bapher bapher halor ka jingpynroi ïa ki Sports Hostels, District Indoor Stadiums, ka jingthung ïa ki Coach, Talent Identification, ki lympung ïalehkai kiba hap ban pynlong, ka jingkyntiew jong ki lympung ïalehkai, ka jingpynkhlaiñ ïa ka Sports Ecosystem bad ki prokram jong ka Youth Affairs.
Katei ka kynhun ka la kyrpad ruh ïa katei ka dkhot jong ka NITI Aayog ba kan ïarap ban pynsuk ïa ka jingïoh jingïarap na ka tnat ïalehkai jong ka Sorkar Pdeng bad DoNER, na ka bynta ka jingpynlong kaba seisoh ïa ka 4th North East Games ha Arunachal Pradesh. La pynpaw ba kine ki lympung ïalehkai ki long ka rynsan kaba kongsan na ka bynta ka Talent Identification, jingïalehkai, bad ka jingkyntiew ïa ki nongïalehkai ha ka thaiñ.
Ka NESA ka la pynpaw ruh ïa ka jingïaroh halor ka jingpynbun ïa ka jingmang pisa na ka bynta ki kam ïalehkai jong ka ri, khamtam ha ka jingpynkhreh ban pynlong ïa ka Commonwealth Games ha u 2030 bad ka jingthmu jong India ban pynlong ïa ka Olympic Games ha u 2036. La ïakren ruh halor ka National Sports Governance Act, 2025, kaba kynthup ïa ka jingpynkhlaiñ bad ka jingpynlong ïa ki ‘regional sporting competition’ ha kylleng ka ri.
Da ka jingithuh ïa ka jingbun ki sap ïalehkai ha ka thaiñ shatei lammihngi, na ka liang katei ka dkhot ka la pyntip ba kan sa wan jngoh ïa ki jylla ka thaiñ shatei lammihngi ban ïohi bad sngewthuh ïa ki jingeh bad ki lad ki lynti kiba donkam ban ai jingïarap, bad ban ai ki jingai jingmut kiba biang na ka bynta ban kyntiew ïa ki samla ha ka thaiñ.
Hapoh kane ka kynhun la kynthup lang ruh ïa ka V. Lalzawmliana, Secretary General ka Mizoram Olympic Association; u N. Kathsu, Joint Secretary ka Nagaland Olympic Association; u Bamang Tago, Secretary General ka Arunachal Olympic Association bad u Tai Hipil, Treasurer ka Arunachal Olympic Association.
