Shillong, Ïaïong 26
Ka lympung ïalehkai East Khasi Hills District Level Inter School Athletic Meet 2024 ba la pynïaid da ka shlem treikam u District Sports Officer (DSO) ka East Khasi Hills ha ryngkat ka jingïatrei lang bad ka East Khasi Hills District Athletics Association, ka la poi sha kaba kut ha ka Sngi Thohdieng ha S.A.I Training Centre, Shillong.
Ha kane ka lympung ïalehkai kaba la neh lai sngi lynter la wan ïashim bynta da 47 tylli ki skul na East Khasi Hills District ha ki lai tylli ki kyrdan ïalehkai kata ka Under-14, Under-16 bad ka Under-18 jong ki shynrang bad kynthei.
Ha kane ka sngi la ïadonlang u Director jong ka School Education and Literacy u Swapnil Tembe uba long u kongsan ha kaba la ïadon lang District Sports Officer ba la shongthait u Bah G.E Lyngdoh, Bah O. Mawthoh, DSO, Bah Goldenstar Kharbuli, Vice President jong ka Archery Association of Meghalaya bad kiwei.
Ïa ka nam lahduh ha ka kyrdan ïalehkai Under-14 ha ka liang ki shynrang la rah da ka Army Public School kaba la khur 2 tylli ki takma, katba ha ka liang ki kynthei la rah da ka Lereto Convent ha kaba la khur 3 ki takma ksiar bad mar 2 tylli ki takma rupa bad rnong.
Ïa ka nam lahduh ha ka Under-16 ki shynrang la rah da ka St. Anthony’s kaba la khur 6 ki takma ksiar bad kawei ka rupa, katba ha ka liang ki kynthei la rah da ka Garo Union School kaba la khur 5 ki takma ksiar bad kawei ka rnong.
Haba phai sha ka Under-18 jong ki shynrang la rah da ka H. Elias Memorial HSS kaba la khur 4 ki takma ksiar bad mar kawei ka takma rupa bad rnong, katba ha ka liang ki kynthei la rah da ka St. Mary’s HSS kaba la khur 6 ki takma ksiar bad 3 ki takma rnong.
