Washington, Iaïong:
Katkum ki khubor la ong ba 2 tylli ki jaka bam ‘Restaurant’ jong ki nong India kaba don ha Colorado, ki la dep bam haduh USD 3,80,000 ka pisa na ki nongbei tyngka ban pyniaid ia katei ka kam ka jam. Kumta la ong ba ki bor aiñ jong ka Colorado ki dang pynbor ban phah siew noh biang ia baroh katei ka pisa ba ki la pynlut bad shim na kitei ki nongbei pisa naduh kaba sdang.
Katkum ki sakhi-sabut ba la ioh lum, la ong ba ki trai jong kitei ki dukan bam kiba kynthup ia ka ‘Bombay Clay Oven’ bad ka ‘Saucy Bombay’ ki la pynbiej ha rukom ba dei ia kito ki briew kiba la theh pisa ha ki, da kaba ai daw ba kin ioh ban pynheh ia katei ka kam jongki ha kylleng jong ka ri United States khnang ba kin ioh ia katei ka pisa kaba ki pan kum ka ram na kitei ki nongbei pisa.
Ia kitei ki 2 tylli ki jaka bam la pyniaid hi da ka The Bombay Group (TBG), kaba la ioh jingmynjur na ki bor ka aiñ hapoh katei ka nongbah.
Hynrei la ong ba kitei kiba theh pisa ha katei ka kam khaïi jong katei ka kompeni, kim pat shym la ioh ia katei ka pisa ba katei ka kompeni ka la kular ban siew ia ki ha ka por ba la buh ha ryngkat ki jingmyntoi ba ki dei ban ioh na kaba iatrei lang bad katei ka kompeni.
Kumta, kitei ki nongbei pisa ki la pynbna ia kane ka khubor sha ki paidbah khnang ba kito kiba kham bit- kham biang kin ym ngat ha katei kajuh ka kam thok kumba ma ki, ki la shah leh thok bad shah pynbiej ha kitei ki trai dukan.
