Washington, Nailur:
Ka kynhun jong ka Iran ka la pynlong ïa ka jingïakren ba beit nyngkong eh bad ki heh ophisar jong ka US hapdeng ka jingïalang bah jong ka UN, katto katne kynta hadien ba u President jong ka America, u Donald Trump, u la byrngem ban “pynduh pyndam noh” ïa ka ri Islam lada ym lah ban ïasoi kloi ban pynkut noh ïa ka thma kaba la jan dap hynriew bnai.
Ka jingïaleh kaba khlem khmih lynti hapdeng ki nongshun kiba la slem bha ka la wan ha ka por ba ka kynhun jong ka Iran ka la leit sha New York na ka bynta ka jingïalang bah jong ka ri kaba man la u snem. U President ka US u la ong hadien ka jingkren jong u ba ki nongmihkhmat ba hakhmat duh jong u, u Steve Witkoff bad u Jared Kushner, ki la ïa kynduh kumba lai kynta eiei bad ki heh sorkar jong ka Iran ha shilynter jong ka jingïalang jong ki nongïalam jong ka pyrthei ba man la u snem.
U Trump u la ong ba ka dei ka jingïalang kaba bha bha, bad ki jingïakren kiba kham bnïah kin sa long ha ka por ban wan. Hadien kata u la bynrap ba ki heh jong ka Iran kim dei “kiba ha khlieh duh, hynrei ka dei kaei kaei.”
Hynrei ka telebishon jong ka sorkar Iran, ka la ïathuh ba u myntri kam bar ri u Abbas Araghchi u dei shi bynta na ka kynhun kaba la leit sha ka jingïakren beit kaba nyngkong eh hapdeng ka US bad ka Iran naduh u late u Jylliew.
Ha kajuh ka por, u Witkoff u la ong ha ka jingthoh ha ka X ba ïa kane ka jingïakren la pynlong lyngba ki nongpynïasuk kiba ïaid hapdeng ki kynhun jong ka US bad ka Iran. U la bynrap ba u kyrmen ba ka jingpyrshang “kan pynshisha ba ka long kaba tei bad kaba ai jingkyrmen.”
Kane ka jingïakynduh ka long hadien ba la bun bnai ka jingïadei hapdeng ka US bad ka Iran ka la nang sniew hadien ka jingkhyllem jong ka jingïateh kular kaba lyngkot kaba la pynbeit ha u bnai Rymphang. Ki nongïakren jong ka US bad Iran ki la ïakynduh kyrpang ïa ki nongïakren jong ka Qatar bad Pakistan ha Doha ha kaba sdang jong u bnai Jylliew na ka bynta ban ïakren khlem da pynïasoh.
