Shillong, Ïaïong 28
U Dawanpynshai Marweiñ uba dei u Meghalaya NCC Cadet u la ïoh khur ïa ka takma ksiar ha ka Sports Shooting kaba la pynlong da ka NER NCC Directorate ha Indira Gandhi Athletic Stadium, Guwahati.
U Dawanpynshai Marweiñ, uba dei na Nongpoh, u dei u Senior NCC Cadet jong 2 Meghalaya Battalion NCC/ Shillong Group na St Anthonys College, Shillong. Une samla u la dei uwei napdeng ki 24 ngut ki dkhot ka NCC Sports Shooting, ka kynhun ba mihkhmat ïa ka Meghalaya ha katei ka jingïakob kaba la long naduh ka 18 tarik haduh 26 tarik mynta u bnai.
Ka jingleit ïakhun jong une u samla sha katei ka jingïakob ka la long shisha kawei na ki jingïakhun kaba eh, namar u la hap ban mad nyngkong ïa ka jingshit kyrang jong ka suiñ bneng, hynrei lyngba ka jingtrei shitom bad ka mynsiem ïakhun, u la lah ban khur ïa ka takma ksiar.
Halor kane ka jingjop, u Dawanpynshai u la shim ba kane ka jingjop, ka dei lyngba ka jinglah jong ki NCC Instructor Staff jong ka 2 Meghalaya Bn na ka bynta ka jinglah ka jong ki ban ailad ïa u bad ka kynhun ka por kaba bun ha kaba kilan met.
Hadien kane ka jingjop, ka thong ba hakhmat jong u Dawanpynshai ka long ba un nang pynkhreh bha shuh shuh ïa lade ynda u mut ban mihkhmat pat sa ïa ka kynhun jong ka NER NCC Directorate ka ban ïashim bynta ha ka All-India NCC Shooting Competition bad ha ka Republic Day Parade 2025 Competition ka ban sa long ha nongbah New Delhi.
