Taipei, Iaïong:
U jumai ba 6.1 Magnitude u la pynkhynñiuh ia ka thaiñ Hualien jong ka ri Taiwan ha ka Sngi Saitjaiñ katkum ka jingpynbna ba la pyntip da ka tnat ba dei khmih jong ka Taiwan ha katei ka step.
La ong ba utei u jumai u la pynkhih ia katei ka thaiñ bad kumjuh ruh ha ka nongbah Taipei baroh kawei, ha ka jingjylliew kaba 24.9 Kilometre lane 15.5 Mile.
Ka Taiwan ka la ioh mad ia palat 1,000 tylli ki jumai kiba rit hadien jong u jumai-bah uba 7.2 Magnitude uba la pyn khynñiuh ia ka Hualien ha ki khyndiat por ba la leit jong une hi u Iaiong, ha kaba 17 ngut ki la duh noh ia ka jingim ha katei ka jingjia.
Hynrei la ong ba ka jingkhynñiuh jumai kam long shuh kaba khyllah ne kaba jia ryngkhat ha katei ka ri dew lynnong Taiwan namar katei ka ri ka don ha ka bynta jong ka pyrthei kaba u jumai u ju khynñiuh khah-khah bad ki paidbah kiba shong ha katei ka ri ruh kim da long kyndit shuh haba ki iohsngew ne sakhi ia u jumai uba malu- mala hynrei lait noh tang ia u jumai uba la kham khlaiñ bad uba kim ju kham ioh mad koit.
