Shillong, Ïaïong 28
U James PK Sangma uba dei u Myntri Sorkar barim ka jylla bad uba bat mynta kum u Chairman jong ka Meghalaya Infrastructure Development Corporation (MIDC) u la shah thung kum u Chief Advisor jong ka Tura District Cricket Association (TDCA).
Ïa katei la pynbna ha ka sngi Saitjaiñ, ha ka shlem treikam jong ka TDCA kaba don ha Alotgre bad la thung ruh ïa u Saljagring M Marak, kum u nongaibuit jong ka Association.
U President ka TDCA u DD Shira u la pynpaw ba da ka jingshemphang jong u James bad u Sajagring kin ïatai bad shimkhia ban kyntiew ïa ka jingïalehkai kriket ha rilum Garo ka ban long ka kabu ksiar ban kyntiew ïa ka sap ka phong jong ki khynnah ïalehkai kriket.
Ka TDCA ka dei ka kynhun kaba la bna nam ha ka thaiñ, kaba ju pynlong manla ka por ïa ka jingïakob ïalehkai kriket bad ki jingai jinghikai ïa ki khynnah ba kin pyntbit ïalade hapoh ka Alotgre Cricket Ground.
Da ka jingtrei shitom kane ka Association, kala lah ruh ban pynmih ïa ki nongïalehkai kriket kiba tbit kiba la mihkhmat ïa ka jylla Meghalaya ha ki lympung jong ka BCCI.
Halor kane ka jingshah thung kum u Chief Advisor ka TDCA, u James PK Sangma u la ong, ba un shimkhia ha kaban kyrshan ïa ka jingangnud jong ki khynnah bad ki samla kiba ïalehkai kriket ha ka thaiñ.
