Oklahoma, ïaïong:
Ki bor pyniaid ka United States ha ka Sngi U Blei ki la iathuh ba katto katne ki bynta jong ka Oklahoma bad ki thaiñ ba marjan jong ka Great Plains ki la sakhi ia bun tylli ki jingkhie ‘eriong bad ki ‘erlangthari ha ki sngi ba la dep. Kaba kham shah ktah jur pat ka dei jingkhie jong arsien ki ‘erlangthari tang hapoh katto katne kynta kawei hadien kawei.
La ong ba napdeng ki 78 tylli ki ‘erlangthari kiba ka US ka la sakhi ha ka Sngi Thohdieng, kham bun ki dei kiba leit ban lynshop ia ki bynta jong ka Nebraska bad Iowa. Katba, ha ka Sngi Saitjaiñ pat la pyntip ba 35 tylli ki sien lynshop jong ka ‘erlangthari la iohi bad sakhi ha ki bynta jong ka thaiñ Shatei ka nongbah Texas shaduh Missouri.
Hynrei hapdeng kitei ki jingjia, la ong ba ym shym la don eh kiba shah ktah ne khlad hynrei kaba sngewsih pat ka long ba napdeng 2 ngut kiba khlad ha katei ka jingjia, iwei i dei i khyllung ba dang 4 bnai tam na ka shnong Oklahoma jong ka Holdenville.
La ong ba ha katei ka sngi la sakhi ruh ia u slap bajur ha ki katto katne ki bynta bad uba la neh ruh kumba katto katne kynta ha katei ka sngi kaba la wanrah ruh ia ki jingshlei um bad kiwei ki jingjia kiba ju wanrah da ki bor ka mariang.
Katkum ki dur-khih bad ki dur kiba la saphriang paidbah ha ki rynsan ‘Social Media’, la lah ban iohi ia ki iing ki sem kiba la shah rat bad julor ha ki thaiñ jong ka shnong Sulphur, kaba don sha ka phang South-Central jong ka thaiñ Oklahoma, ha kaba ki kali kiba don ha katei ka shnong ruh ki la shah rat, ki la julor bad don ruh kiba la kylla khongpong syndon.
Ha katei ka sngi la iohi ruh ba ki trok kiba leit poi sha Sulphur ki la hap ban sangeh noh ha ki jaka kiba kham biang ban lait na kitei ki jing lynshop jong ki bor ka mariang namar ki iing ki sem kiba don ha katei ka thaiñ ki la julor lut.
La ong ba kawei na kitei ki 2 tylli ki ‘erlangthari kiba wan lynshop ha katei ka sngi, ka la khyrwa bad rah ia ki lyngkhot- lyngkhai bad kyntiew shaduh ka jingjrong kumba 20,000 phut shalor suiñ lane kumba 6,100 Meter ka jing jrong.
Haba iadei bad kane, u Lat ka Oklahoma- u Kevin Stitt u la pynbna ia ka jingdonkam jingiarap ba kyrkieh hapoh kine ki 30 sngi ha kitei ki thaiñ kiba la shah lynshop ha kitei ki ‘erlangthari bad kumjuh ruh ka jingdonkam ban pynpoi ia ki lad jingiarap bad ki bam- ki dih sha kito ki 12 tylli ki bynta kiba la shah ktah jur eh na kitei ki bor ka mariang.
Shuh shuh ruh la ong ba ki don palat 50,000 tylli ki longiing na ka nongbah Texas bad kumba 30,000 tylli pat ha Oklahoma kiba la hap ban shong dum tad haduh ka Sngi U Blei namar ka jingthud ka bor ding ilektrik hadien ka jingleit lynshop jong katei ka ‘erlangthari da ki bun kylla ha kitei ki sngi ba la leit.
Hynrei la ong ba kitei ki bynta jong ka US, ki dei kiba ju sakhi bha ia ki ‘erlangthari bad ki ‘eriong namar ka jingiajan jongki bad ki bynta rud duriaw.
