Shillong, Ïaïong 29
Ka kynhun ïalehkai ka ri India kaba la bat teng ïa ka nam lahduh mynta ka la jam sha ka quarter final ha ka Thomas Cup hadien ba lah ban tam da 5-0 ïa ka England ha ka jingïakhun jong ka Group-C ha ka Lah Sngi U Blei ha Chengdu.
Ka India, kaba la lah ban pynliem ïa ka Thailand da 4-1 ha kaba sdang jong kane ka jingïakhun, ka la bteng ban khur biang ïa ka jingjop kaba ar na ka bynta ban ïoh rung sha ka quarter final.
Ha kane ka jingïakhun u HS Prannoy u la wanphai da ka jingjop hadien ba u la lah ban pynliem noh ïa ka Harry Huang da 21-15, 21-15 na ka bynta ban pynlong ïa ka India ban tam da 1-0.
“Ka long kaba kongsan ban khur ïa ka jingjop ha kaba sdang jong kane ka jingïakhun naamr ka ïarap ban pynkhlaiñ ïa ka kynhun ba kan nangjam shaphrang. Te kumta ka long kaba kham kongsan ïa ka kynhun ba kan nangbteng ban khur ïa ka jingjop kumba ngi la lah ban pynliem ïa ka Thailand,” la pynpaw u Prannoy hadien ba kut ka jingïalehkai.
Kumjuh ki ar ngut ki rangïalehkai ka ri kata u Satwiksairaj Rankireddy bad u Chirag Shetty ki la lah ban pynliem noh ïa u Ben Lane bad u Sean Vendy ha ka jingïalehkai ‘doubles’ da 21-17, 19-21, 21-15 ha ka jingïakhun kaba la neh shi kynta bad san minit.
U khlur ïalehkai ka ri uba la bat teng ïa ka kyrdan ba nyngkong ha ka pyrthei, u Kidambi Srikanth u la khur ïa ka jingjop da 21-16, 21-11 hadien ba u la lah ban pynliem noh ïa u Nadeem Dalvi na ka bynta ban pynlong ïa ka India ban tam da 3-0.
“Ka jingkmen halor ka jinglah ban ïalehkai kiba nga la lah ha baroh ar ki jingïakhun. Watla ka la don hapdeng ki jingeh hynrei ngi la lah ban khur ïa ka jingjop. Nga sngew ban ong ba la lah ban jop da kaba suk ïa ki nongïalehkai ka liang pyrshah. Hynrei ha kane ka kynti kaba mynta ngin ïakynduh ia ki nongïalehkai kiba kynsai bad nga lah ban ïalehkai bha,” la ong u Srikanth.
Kumjuh ki ar ngut ki rangïalehkai ka ri kata u MR Arjun bad u Dhruv Kapila ki la lah ban pynliem noh ïa u Rory Easton bad u Alex Green da 21-17, 21-19 ha ka men’s doubles. Ha ka jingïakhun kaba khatduh u Kiran George ba dang 24 snem ka rta u la khur ïa ka jingjop da 21-18, 21-12 ïa u Cholan Kayan.
Te kumta ka India kan pynkhreh ïa ka jingïakhun kaba khatduh jong kane group pyrshah ïa ka Indonesia kaba la bat ïa ka nam lahduh haduh 14 sien ha ka sngi Balang.
