Sana’a, ïaïong:
Katkum ki khubor, la ong ba ki lehnoh Houthi na Yemen ki la thombor biang ia ka jhad kit umphniang bad ia ki drone jong ka United States wat hapdeng ki jingmaham jong ka US bad ka jing-iakynad kaba la pur ruh sha kiwei ki ri namar ka jingleit hiar thma ba khlem sangeh jong ka Israel ia ka Gaza.
U nongrah ktien ka Houthi, u Yahya Saree ha ka Sngi U Blei u la pyntip ba ki Houthi ki la ioh ban siat pynbthei ia ka drone jong ka US hapoh ki bynta jong ka duriaw Red Sea katba ki dang thmu ban thombor ruh ia ka jhad kit mar jong ka Britain ka ‘Andromeda Star’ kaba don mynta ha Red Sea. Kumta, la ong ba katei ka jhad ka la shah thombor da ki ‘namding bad ka la don ruh ia ki dak mong ha ki bynta jong ka bad wat la katta ka US Central Comman (CENTCOM) ka la pyntip ba kitei ki jingjulor ha katei ka jhad ki long tang kiba rit bad kiba malu-mala bad ki bym don jingktah ne wanrah jingma eiei.
U Saree u la pynbna ruh ba ka Houthi ha katei ka sngi ka la ioh ban siat pynhap ia ka drone ‘MQ-9’ jong ka tnat shipai US kaba la pyntreikam ia katei ka drone naka bynta ban peit thuh bad ban thombor ia ki lehnoh Houthi sha Yemen.
Katba na ka liang ka tnat shipai US, kam pat shym la ai jingpynshai ne kren eiei halor katei ka jingkam jong ka Houthi hynrei ki lad pathai khubor ki la pynshisha ia ka jingshah siat pynbthei jong katei ka drone ‘MQ-9’ jong ki shipai US hapoh Yemen.
Kumta, la ong ba katei ka drone ka la long kaba lai (3) napdeng kito kiba la shah siat pynhap ha ki lehnoh Houthi naduh ba sdang ka jingiakynad hapdeng katei ka kynhun lehnoh na Yemen bad baroh ki jhad jong ki ri bapher kiba la leit poi sha katei ka bynta jong ka duriaw bad kaba la sdang ruh naduh ba la jia ka jingiakhun thma hapdeng ka Israel bad ki lehnoh Hamas jong ka Palestine.
Kumjuh ruh na ka liang jong ka Britain pat, ka United Kingdom Maritime Trade Operations (UKMTO) ka la pyntikna halor ki 2 tylli k jingshah thombor jong katei ka jhad MV Andromeda Star hajan al-Mukha (Mocha) jong ka Yemen.
Namar la ong ba dei tang katei hi ka kynhun lehnoh Houthi na Yemen kaba ju pynthud bad thombor ia kat ki jhad kiba leit poi iaid lynti sha ki bynta jong ka Gulf of Aden, da kaba ther ia ki ‘namding bad ki drone sha ki bynta rud duriaw jong ka nongah Eilat jong ka Israel.
Hynrei u Abdel-Malik al-Houthi pat uba long u nongialam jong katei ka kynhun lehnoh Houthi, um shym la ai jingpynshai eiei halor kitei ki jingjia ha katei ka sngi hynrei u la shu maham lypa ba ka Houthi kan nang pyni ia ki kam thombor jongka katba ka Israel kam pat sangeh ia ka jingleit hiar thma pyrshah ia ki lehnoh Hamas kiba synshar hi ia ka nongbah Gaza jong ka Palestine mynta da ki phew snem.
Namar ka Houthi ka la byrngem ba kan kput beit ia kat ki jhad kiba leit poi sha kitei ki bynta ka duriaw jongka bad ha kajuh ruh ka por ka la kular ba kan sangeh noh shi syndon ia ki kam thombor jongka ha kitei ki bynta jong ka duriaw lada ka Israel ka mynjur ban sangeh noh ia ka jingleit hiar thma sha Gaza Strip.
Shuh shuh ruh la ong ba ha kito ki bynta ba la synshar hi da kitei ki lehnoh Houthi hapoh Yemen, ki la mih ki jingiakhih paidbah kiba jur naduh ba la jia katei ka jingleit hiar thma jong ka Israel sha Gaza, da kaba pynpaw ia ka jingkyrshan jongki ia ka Palestine bad ia ki nong Palestine kiba don hapoh ka nongbah Gaza ba ka Israel ka leit ban hiar thma.
