Jerusalem, ïaïong:
Ka Israel ha kane ka kynti ka la pyntip ba ki don shibun ki jingiarap bad jingnoh synñiang ki ban sa pynpoi sha Gaza Strip ha kine ki khyndiat sngi ban wan hadien ba ka Israel ka la ailad ia ki bynta khappud bad ka Gaza ban rung ban mih na ka bynta ban leit pynpoi ia kitei ki lad jingiarap sha ki paid nongshong shnong ka Gaza.
Kane ka long hadien ba ka Israel ka la khang lad ban pynpoi ki lad jingiarap ba ki tnat bad ki ri bapher bapher ki kwah ban pynpoi sha Gaza naduh ba sdang jong ka thma ha u Risaw mynshem snem. Hynrei la ong ba ha kane ka sien ka Israel kam banse ban pyllait ia kitei ki bynta khappud jong ka khnang ba kitei ki tnat bapher bapher kin ioh ban pynpoi ia kitei ki jingiarap sha Gaza hadien ba ka Israel ka la shah kynthoh bad shah pynbor ia ki tnat bad ki ri bapher bapher ba ka dei ban ai lad ia ki ban pynpoi ia ki jingdonkam ba kongsan sha ki paid nongshong shnong ba lui-lui jong ka Gaza.
Namar la ong ba ka jingleit hiar thma ba khlem sangeh jong ka Israel sha Gaza ka la pynlong ia kiwei pat ki ri ba marjan jong ka Palestine ba kin dawa ia ka Israel ba ka dei ban ai lad ban pynpoi ia kitei ki jingiarap jong ki sha ki paid nongshong shnong ka Gaza khnang ba kin ioh ban pynbit pynbiang ia ki jingdonkam ba kongsan eh ba ki paidbah ki donkam hapdeng ka jingim ka bym shngaiñ bad ka bym bit bym biang shuh naduh ba ka thma ka la neh mynta la 7 bnai.
Kumjuh ruh na ka liang ka United States dang ha ki khyndiat taiew ba la leit, ka la pdiang sngewbha ia katei ka rai jong ka Israel ban ai lad ia ka jingpynpoi ia kitei ki lad jingiarap bad ki jingdonkam kiba kongsan ban pynpoi sha ki paidbah nongshong shnong jong ka Gaza khnang ba kan iarap ban pyllait ia ki na ki khyndiat ki jingeh ba ki la hap ban mad baroh shi katta.
