Kyiv, ïaïong:
U heh ka tnat shipai jong ka Ukraine ha ka Sngi Nyngkong u la iathuh ba ki shipai ka Ukraine ha ka Sngi U Blei ki la hap ban ieh noh ia 3 tylli ki shnong jong ka Ukraine ha ka kti ki shipai ka Russia hadien ba ki shipai ka Russia ki la iakhun tyngeh ban ioh knieh shuh shuh ia ki bynta ba sah jong ka Ukraine katba ka thma ka dang iaid sha khmat.
Katei ka jingpynbna jong u Colonel General – Oleksandr Syrskyi ka long hadien ba ka Ukraine ka la pynpaw ia ka jingsngewkhia halor ka jingtlot jong ka Ukraine sha kitei ki bynta jong ka thaiñ East namar ka jing khlaiñ jong ki shipai ka Russia ha katei ka bynta.
Kumta, utei u heh jong ka tnat iada ka Ukraine u la iathuh ba ka Ukraine ha kum kane ka por ka donkam ia ka jingiarap kaba jur na ki paralok bad ki para marjan ri khamtam na West namar la ong ba ka Russia ka la iakhun tyngeh ban ioh knieh bad kurup noh syndon ia ki bynta ba sah jong ka Ukraine.
Ha kajuh ka por, u President ka Ukraine- u Volodymyr Zelensky u la kyntu biang ia ki para marjan ri ba kin pynkloi ia ki jingiarap bad ban ai biang ka jingkyrshan kaba rad-bah ia ka Ukraine khnang ba kan lah ban iada ia u pud-u sam na ka kti jingleh donbor jong ka Russia ha kane ka sien.
U Zelensky u la iathuh ba ha ka Sngi U Blei u la ioh ban iakren bad u heh ka tnat House Minority jong ka US- u Hakeem Jeffries halor ki jingeh ba ka Ukraine ka iakynduh ha kane ka por bad ia ki jingdonkam na ka bynta ban pynkhlaiñ ia ka tnat shipai.
U Syrskyi u la iathuh ba ki shipai ka Ukraine ki la sdang ban pynkhlaiñ ia ka jingiada na ki shnong kiba don sha ka thaiñ West jong ka Berdychi bad Semenivka, kumjuh ruh sha ka phang North jong ka Avdiivka bad Novomykhailivka bad sha ki thaiñ South hajan jong ka shnong Maryinka.
Ha ka jingshisha, utei u heh ka Ukraine u la iathuh ba ki shipai ka Russia ki la ioh lad lypa ban rung bad knieh da ka bor ia kitei ki 3 tylli ki thaiñ kiba ki shipai ka Ukraine kim lah shuh ban iakhun ne tehlakam ia ka jingleit tur ki shipai ka Russia.
