Shillong, Ïaïong 30
Ka shlem treikam u District Sport Officer (DSO) Ri Bhoi District ka la pynkynriah noh ïa ka lympung ïalehkai District Level Inter School Athletic Meet 2024, kaba la thmu ban sdang naduh ka sngi Balang NSCA Mini Stadium Pahamsyiem kaba ha Nongpoh.
Kane ka jingpynkynriah ka dei na ka daw ka jingshit kyrang ka bneng bad kaba la pynlong ïa ki bor Sorkar ha kine ki khyndiat sngi ba la lah, ban kyntu ïa ki bor pynïaid skul ba kin kiar na kaba pynlong ïa kino kino ki prokram shabar namar ka lah ban ktah ïa ka koit ka khiah jong ki khynnah.
Na ka liang u DSO katei ka district u Bah Bobby L. Nongbet u la pynpaw ba ïa kane ka lympung kaba la thmu ban sdang naduh 1 haduh 3 tarik u Jymmang, yn hap ban pynkynriah noh shaduh ka taiew ka ban wan bad kane kan shong kum ka jinglong jong ka mariang.
“Ngi la rai ban pynsangeh noh shwa ïa kane ka lympung bad lah ban pynlong ha ka taïew ban wan. Kane ka long hadien ba ngi la ïoh ban ïamir jingmut lang bad u Deputy Commissioner (DC), uba la bthah ïa ngi ba ngin hap ban peit bha ïa ka jinglong ka mariang namar ka jingshit palat ka bneng bad kaba lah ban ktah ïa ka jingkoit jingkhiah jong ki khynnah ïalehkai,” la pynpaw u Bah Bobby.
Utei u DSO u la buh ka jingkyntu ïa baroh ki skul baroh kiba thmu ban ïashim bynta ha kane ka lympung ba kin ïai shah shipor bad ruh ba kin long ba la pynkhreh ïa ki khynnah namar lah ban pynbna ha kano kano ka por ban sdang ïa kane ka lympung.
“Kumba phi ïa tip ba ka State Level ruh kan sdang ha kaba kut jong mynta u bnai Jymmang, te kumta ngin ïaleh ban pyndep noh ha ka taiew ka ban wan bad kane ruh kan shong kat kum ka jinglong ka suiñ bneng.
Kumba ka paw ka jingshit jong ka bneng ha ka sngi Ba-ar ha Nongpoh ka la poi haduh 32°Celsius.
