Shillong, Ïaïong 30
Ka Anmol Kharb ka la hap ban mih noh na ka jaka ïalehkai badminton ha ryngkat ki jingjaw ummat na ka daw ka jingmynsaw ka kjat kaba ka la pynlong ïa ka kynhun ki ‘thei ïalehkai ka ri ban shah rem noh da 0-5 ha ka China ha ka jingïakhun kaba khatduh jong ka group-A ha ka Uber Cup kaba la long ha ka sngi Ba-ar ha Chengdu kaba ha China.
Wat la ka India ka la ïoh rung lypa sha ka quarter finals hadien ba jop pyrshah ïa ka Canada bad Singapore, ka Ashmita Chaliha ka la hap ban shong shabar na ka jingïakhun pyrshah ïa ka nongïalehkai kaba la bat haduh 15 sien ïa ka nam lahduh. Kane ka kynhun ka la ïakhun khlem ki khlur ïalehkai kum ka PV Sindhu, ka bym shym la ïashim bynta ha kane ka lympung.
Ka Anmol kaba dang 17 snem ka rta ka la hap ban shongthait noh shipor na kane ka jingïakhun na ka daw katei ka jingmynsaw ka kjat ha ka jingïakhun kaba ar jong ka jingïalehkai kaba para marwei.
Ha kane ka jingïakhun, ka lahduh jong ka Olympic bad kaba la bat ïa ka kyrdan ba-ar ha ka pyrthei ka Chen Yu Fei ka la sdang ban ïalehkai bha na ka bynta ka China ha kaba ka la lah ban khur jingjop da 21-12 21-10 pyrshah ïa ka Isharani Baruah, kaba don ha ka kyrdan ba 83.
“Kawei kaba pynduh mynsiem ïa nga ha kane ka jingïalehkai ka dei na ka daw kiba bun ki jingbakla wat la nga la thrang ban ïalehkai bha, hynrei ka la long ka jingjop da kaba suk ïa ka,” la pynpaw ka Isharani hadien ba la kut ka jingïalehkai jong ka.
“Ka long ka nongïalehkai kaba kynsai bad nga ïoh ïa shibun ki buit ïalehkai haba nga ïakhun pyrshah ïa katei ka nongïalehkai kaba na China,” ka la bynrap.
Ki lahduh hapoh ka ri kata ka Priya Konjengbam bad ka Shruti Mishra kiba don ha ka kyrdan ba 67 ha ka pyrthei, kim shym la lah ban shan hakhmat ar ngut ki lahduh jong ka pyrthei ka Chen Qing Chen bad ka Jia Yi Fan, kiba la lah ban pynurlong ïa ka China ban khur ïa ka jingjop da 21-13 21-12.
Ha kiwei pat ki ar ar tylli ki jingïalehkai, ka Liu Shen Shu bad ka Tan Ning ki la lah ban pynliem noh ïa ka Simran Singh bad ka Ritika Thaker da 21-9 21-10, katba ka Tanvi Sharma ka la shah rem noh da 7-21 16-21 ha ka Wang Zhi Yi ha kaba ka la pynlong ïa ka China ban tam da 5-0 ïa ka India.
Lyngba kane ka jingshah rem ka India ka la pynkut ïa kane ka jingïalehkai da kaba ka la wan ha ka kyrdan ba-ar kata hadien ïa ka China.
