New York, Jymmang:
Da ki phew ngut ki pulit kiba phong jingda khlieh (helmet) ki la leit ban rung sha ka phyllaw jong ka Columbia University kaba don ha ka phang pdeng jong ka nongbah New York ha ka Sngi Ba-ar hadien ba kim shym lah ban pynkynriah ne pynsangeh ia ka jingiakhih jong khynnah pule nong Palestine.
Ki nongthoh khubor ki la pynphriang ia ki dur ha kaba la iohi ia ki pulit kiba leit ban kiew sha ka mala kaba ar jong katei ka jaka pule ha ka Hamilton Hall na ka jaka ba ki la pynieng ia ka jingkieng bad hadien kata ki la shu jah kumto haba ki la rung hapoh jong katei ka jaka.
Hynrei ka tnat pulit Columbia ka la iathuh ba kitei ki pulit ki dang peit thuh bad kin kem ruh ia kito ki nong-ialam kiba lam khmat ia katei ka jingiakhih ha katei ka jaka pule.
Namar la ong ba katei ka Hamilton Hall ka long ka jaka ba kitei ki khynnah pule ki la kerkut bad ki la pynlong jaka shong ha katei ka jaka bad kim ailad shuh ia kiwei pat ki kam ban pyndonkam ia katei ka jaka. Namar kitei ki khynnah pule ki la pynpaw ruh ia ka jingsngewkhia kaba jur haba iadei bad ka jingïap ki paidbah nongshong shnong ba lui-lui ha Gaza bad ki la ong ruh ba kin iakhun bad kin leh lade na ka bynta ka jaitbynriew namar ka jingleit kput jong ka Israel ia ki Hamas ka la ktah jur pat ia ki paidbah nongshong shnong ki bym don dak shun eiei ia ka Israel hynrei kiba long tang ki nongshong shnong jong ka nongbah Gaza.
Kumta la ong ba ki la mih shibun tylli ki jingiakhih paidbah ha kylleng ka United States ha kine ki sngi, hadien ba kito ki nongialam lane ki bor pyniaid jong ki skulbah ha United States ki la pynpaw ka jingsngewkhia namar ka jingmih jong ki jingiakhih paidbah ha man baroh ki skulbah ba paw jong ka US.
Ki bor pyniaid jong katei ka skulbah ki la iathuh ba haba ki la leit ban pynsngewthuh bad phah ia ki ban kynriah ne sangeh noh ia katei ka jingiakhih, kitei ki nongïakhih ki la ong ba kin nym kynriah na katei ka jaka bad kin ym pyndem kaba ka US kam pat lah ban iarap ban kyntu ia ka Israel ban sangeh noh ia ka jingleit hiar thma sha Gaza.
