London, Jymmang:
Katkum ki khubor la ong ba uwei u briew u la talaiñ naphang ia ka waitlam kaba u rah ha kti ha ka Sngi Ba-ar bad u la ioh ban pom pyniap ia uwei u khynnah 14 snem bad pynmynsaw pat ia 4 ngut ki briew ha ka nongbah London ha katei ka sngi. Hadien kane, kawei ka heh pulit jong katei ka thaiñ ka la lah ban pynjai-jai bad la ioh ban kem noh syndon ia u ha katei ka jingjia.
Kane ka jingjia ka la saphriang paidbah ha ki rynsan ‘Social Media’ ha kaba la iohi ia katei ka heh pulit kaba la leit ban pynjai-jai ia katei ka jingjia bad ka la lah ban pynsangeh ia katei ka jingleh lamwir jong utei u briew ha kaba ki pulit ki la ioh ban kem noh syndon ia utei u rangbah uba la don kumba 36 snem ka rta hajan ka Hainault sha ka phang Mihngi jong ka nongbah London.
Katkum ba la iohi lyngba katei ka dur-khih kaba la saphriang paidbah, la iohi ba katei ka heh pulit ka la leit tur sha utei u rangbah ban kren bad pynsangeh ia kaei kaba u la leh baroh wat la la iohi ruh ba utei u briew u ialeh hi ban phet krad bad um shym ailad ïano-ïano ruh ban tur shajan jong u.
Hynrei la ong ba ha ka por ba utei u briew u dang phai da ka dien ban phet, katei ka heh pulit ka la iakhun ban pynkyllon ia u bad ban ioh pynthiah pyllup ha madan ha kaba kiwei pat ki la ioh ban ia bat bad knieh noh ia katei ka wait kaba u la pom briew ha katei ka sngi.
Ki pulit ki la iathuh ba la kem noh syndon ia u namar katei ka jingleh lymwir jong u, ha kaba utei u khynnah 14 snem u la shu duh ei noh ia la ka jingim khlem poi pyrkhat bad kitei ki 4 ngut ruh ki la shu ngat bad mynsaw ei ha katei ka jingjia. Namarkata la ong ruh ba kin hap ban pynngat ia u hapoh ki kyndon pynkheiñ aiñ jong ka ri namar ka jing-leh jong u kam long shuh kaba rit hynrei kaba la wanrah jingma ia baroh ki riew paidbah kiba don ha katei ka jaka bad ha ka lynti iaid jong u lada ym lah ban pynsangeh noh ia u ha katei ka por.
La ong ba utei u khynnah 14 snem u la khlad noh tang mar ia poi hapoh ka jakasumar ba la pynkit ia u. Katba 2 ngut pat napdeng kitei kiba mynsaw ki dei ki heh pulit kiba leit ban tur sha utei u briew ban iakhun bad ialeh ban ioh knieh ia katei ka wait kaba u talaiñ bad mait naphang ia kat kiba don ha ka lynti iaid jong u.
La ong ba ki bor pyniaid katei ka thaiñ ki la ioh jingtip halor ka jingleit tur jong ka kali kaba utei u briew u ñiah sha kawei ka iing ha Thurlow Gardens kaba don sha ka phang East jong ka nongbah London. La iohi ruh lyngba ki camera CCTV ba utei u briew u la mih noh na katei ka kali ha ryngkat ka wait kaba heh ha ka kti jong u hadien ba u la phet na katei ka iing kaba u la leit ban rat bad tynrah da ka kali jong u hi.
Wat la katta, ki pulit ki la iathuh ba katei ka jingjia kam don jing-iadei eiei pat bad ki kam thombor ne ki kam pyntriem jong ki lehnoh. Pynban ka lah ban dei na ka jingktah khlieh jong utei u briew lane ioh lehse ka don kaei-kaei kaba pynlong ia u ban leh ia katei ka kam thombor ha katei ka jingjia.
U heh pulit ka London u la iathuh ba ia baroh kiba ngat ha katei ka jingjia la pynkit mar-mar sha ka jakasumar katba ki lah ban pynkloi hynrei ka long kaba sngewsih ba utei u khynnah um lah shuh ban kyrda bad ka jingmynsaw ka la jur palat ba ki nongsumar kim lah shuh ban pynim ia u ha ka por kaba biang.
