Washington, Jymmang:
Ka State Department jong ka United States ha ka Sngi Nyngkong ka la pynbna ba u Secretary of State u Antony Blinken un sa leit ban jngoh sha Israel bad sha Jordan ha ka Sngi Balang hadien ba ka US bad ki nongialam na Israel ki la ioh ban iakren halor ka jingpyllait noh ia kito kiba shah rahbor baroh ha ka kynhun lehnoh Hamas.
Kumta, la ong ba u Blinken un sa leit ban jngoh sha kitei ar tylli ki ri hadien ba u la wan jngoh na Saudi Arabia ha kine ki khyndiat sngi ba la leit.
Kane ka long ruh hadien ba u President ka US- u Joe Biden bad u Myntri Rangbahduh ka Israel- u Benjamin Netanyahu ki la ioh ban iakren lyngba ka phone halor ki kam ba iadei bad ka thma hapdeng ka Israel bad ki Hamas bad kumjuh ruh haba iadei bad ka jingpyllait noh ia kito kiba shah rahbor ha ka Hamas baroh.
Namar la ong ba ka Egypt, ka Qatar bad ka United States, ki la trei shitom bad ialeh shitom katba lah ban wanrah noh ia ka jing-iasuk hapdeng ka Gaza bad ka Israel bad ban tehlakam noh ia ki jingma kiba khraw kiba ap ia ka pyrthei baroh kawei lada ym lah ban pynsangeh noh ia ka thma Israel ha ka por kaba biang bad kaba kloi-lan.
Namar la ong ruh ba u Biden u la pynpaw ka jingsngewkhia halor ka jingleit hiar thma jong ka Israel sha ka thaiñ Rafah jong ka nongbah Gaza, kaba long ka bynta ha kaba da ki Million ngut ki paid nongshong shnong ka Gaza ki leit ban shong rieh katba ka thma hapdeng ka Israel bad ki lehnoh Hamas ka dang neh bad iaid shakhmat.
Hynrei ka State Department kam shym la pynshai ne pynbna eiei pat halor ki mat ba iadei bad katei ka jingleit jurip jong utei u nongialam sha Jordan bad Israel ha kane ka sien.
