Moscow, Jymmang:
Ka Russia ha ka Sngi Palei ka la pynbna ba ka la ioh kurup biang sa kawei ka shnong sha ka thaiñ Mihngi jong ka Ukraine, ha kaba ki shipai ka Russia ki la iakhun tyngeh mynta la bun sngi ban ioh kurup ia katei ka bynta jong ka Ukraine sha ka phang Mihngi.
Namar ka Russia ka la sdang pynkhlaiñ ruh ia ka tnat shipai da ki tiar kiba kham biang bad da ki rukom pyntbit kiba biang katba ka Ukraine pat ka dang pynap ban ioh ia ki tiar iakhun bad ia ki song jingiarap na ka US khnang ba kan lah ban iakhun bad iada ia la u jong u pud- u sam hapdeng ka jingshah hiar thma ha ka Russia.
Kumta ka tnat iada jong ka Russia ha katei ka sngi ka la pynbna ba ki shipai ka Russia ki la ioh ban knieh noh ia katei ka shnong Berdychi kaba ki la iakhun shitom ha kine ki khyndiat sngi ba la leit.
Kane ka long ruh hadien ba ki shipai ka Ukraine ki la phet bad mih noh na ka shnong Avdiivka dang ha kane ka taiew ba la lah.
Ka Berdychi pat ka don kumba 12 Kilometres lane kumba 7 Miles na Avdiivka, bad kane ka shnong ka long kaba hadien duh ba ka Russia ka la dep kam trai lypa naduh kine ki taiew ba la leit bad ka Russia ka la dep pyntip lypa ba kan sa ioh ban knieh noh ia kitei ki shnong kiba long ki jong ka Ukraine hi hynrei namar ba ki shipai ka Russia ki la ioh ban rung sa tang ban ioh knieh noh ia ka bor synshar na kitei ki shnong na ka kti ki shipai ka Ukraine.
Ka Russia ka la sdang ruh ban pynkhlaiñ ia ki shipai jongka naduh ba ka la ioh ban kurup ia ka Avdiivka hadien ba ka la iakhun shitom da ki bnai ban ioh ban rung bad knieh ia ka bor synshar na katei ka bynta.
Wat la ka Ukraine ha u Rymphang jong une hi u snem ka la pyntip ba ka la ialeh ban pynkhlaiñ ia ka jingiada ha kitei ki shnong naduh ka Berdychi hynrei la ong ba namar ka jingbym kot bor, ki shipai ka Ukraine kim lah shuh ban iada ne ban tehlakam ia ka jing-leit tur jong ki shipai ka Russia ha kane ka kynti.
