Damascus, Jymmang:
Ka tnat iada jong ka Syria ha ka Sngi Thohdieng ka la pyntip ba 8 ngut ki shipai jongka ki la mynsaw na ka jingleit ther bom jong ka Israel hajan jong ka Damascus. Ha katei ka sngi, ka tnat shipai Syria ka la pyntip ba ki shipai ka Israel ki la ther bom na ka phang ba don ka Golan jong ka Syria, da kaba thmu ruh ban thombor sha ka thaiñ hajan jong ka Damascus, ha kaba 8 ngut ki bor pahara ka Syria ki la mynsaw jur na katei ka jingjia.
Katba na ka liang ka Israel pat kam shym la kren ne pynphai ktien eiei halor katei ka jingjia hynrei ka ju maham man ka por ba kan nym ailad ia ka Iran ba kan pyniar ia ka tnat shipai sha Syria.
Kumta, la ong ba ki shipai ka Israel ki la leit ban thombor da ki spah sien sha Syria naduh ba sdang jong ka thma poh iing ha ki snem 2011, da kaba thmu beit ban pynher krad ia ki shipai Iran kiba don hapoh Syria.
Hynrei ka Israel ha kane ka sien ka la sdang ban pynjur biang ia ka jingleit thombor pyrshah ia ka Iran naduh ba ka Iran ka la ai jingkyrshan ia ki lehnoh Hamas kiba leit ban thombor ia ka Israel ha u Risaw jong u snem ba la leit. Ha ka 19 tarik u Iaiong, ka Israel ka la leit thombor sha ki jaka trei kam jong ki shipai ka Syria sha ka phang Shathie jong ka Syria.
Ha kajuh ka por ruh la ong ba ki kynhun lehnoh bapher jong ka pyrthei ki la sdang ban iatylli lang naka bynta ban ai jingkyrshan ia ka kynhun lehnoh Hamas kaba synshar hi ia ka nongbah Gaza bad ka la shah hiar thma ha ka Israel mynta la kumba 7 bnai kynthih.
