Khyber Pakhtunkhwa, Jymmang:
Kawei ka jaka pule ha Pakistan kaba ju tip kum ka Government Postgraduate College ha Timergara, ka la bthah ia ki khynnah pule kynthei ba ki dei ban kiar na ki kam saiñ pyrthei ne ban leit sha ki jingialang saiñ pyrthei, ki dei ban kiar na ki jinglehkmen khawai sngikha bad na kiwei ki kam khamtam haba ki don hapoh ka kolej lane katba ki dang mut ban leit sha jaka pule.
U heh katei ka jaka pule, u Prof Riaz Mohammad, u la phah ia kitei ki adong bad ki jingbthah kiba la wanrah thymmai da ki bor pyniaid jong katei ka jaka pule na ka bynta ki khynnah pule kynthei ba kim dei ban ïadon bynta than ha ki kam kiba bun paidbah ne kiba lah ban ktah ia ka longrynieng jong ki hadien- habud.
Namar u la ong ba ki don shibun ki jingjia kiba ktah jur ia ki khynnah kynthei ha ki jaka pule kumba la ju iohi na ka por sha ka por bad kum shi bynta ban tehlakam ia kum kitei ki jingjia, ki bor pyniaid ki la rai ban wanrah noh da ki kyndon lane ki adong ba ki khynnah kim lah ban iaid lait. Hynrei la ong ba baroh kine ki long naka bynta ka jingshngaiñ jong ki khynnah kynthei hi ba kin ym shah ktah kti ne shah pynthud sharum shaneng.
Kumjuh ruh utei u heh u la kyntu ia ki kmie ki kpa jong ki khynnah pule ba kin iajan bad ki bor pyniaid jong katei ka jaka pule na ka bynta ka jingbha jong ki khun- ki kti jong ki.
Ha katei ka sngi, la ai jingkren ruh da ki katto katne ki heh kiba shah khot sngewbha sha katei ka sngi ba kyrpang ba katei ka jaka pule ka la pynlong bad naduh ki khynnah pule, ki nonghikai ruh ki la leit ban ai burom ia u Syedul Ibrar uba long u nonghikai uba la shong-thait noh namar ka jingshakri hok jong u ia katei ka jaka pule ha ki snem bad ki por ba la leit.
Hynrei, lada pyrkhat ne shim pat na ka liang jong ki kynthei, katei ka rai jong katei ka jaka pule ka la wanrah jingma ia ka hok jong ki kynthei namar kin ym lah shuh ban ioh bynta ha kiba bun ki kam ba ki dei ban ïashim bynta bad ïadon lang bad ki shynrang ha kajuh ka kyrdan bad ha kajuh ka liang. Namar la ong ba wat ha ka liang ka pule- puthi ruh hapoh Pakistan, ka jingnang-jingstad jong ki kynthei ha katei ka ri ka dang long tang 45% na ka jingdon jongki kynthei hapoh ka ri baroh kawei lada ianujor bad ka jingdon jong ki shynrang kumba 69% kiba nang ba stad hapoh ka ri baroh.
Namar kata ruh la ong ba ka la wanrah pat ia ka jingsngew khia ioh ka Pakistan ruh kan long kawei na ki ri ka bym don jingshngaiñ ia ki kynthei bad ka lah ruh ban long kum ha kiwei ki ri khamtam kiba la synshar da ki lehnoh, ha kaba ki kynthei ki shah pyni bor bad shah synshar don bor.
