Shillong, Jymmang 09
Ka Hockey India ha ka sngi Palei ka la pynbna ia ki 24 ngut ki rangïalehkai na ka bynta ka kynhun ïalehkai ka ri ka ban ïashim bynta ha ka FIH Hockey Pro League 2023-24 ka ban long ha Antwerp (Belgium) bad London (England).
Ka wat jingïakhun ha Belgium kan sdang naduh 22 tarik mynta u bnai bad kan kut haduh 30 tarik, katba ka wat jingïakhun ka ban long ha England kan sdang naduh 1 tarik u Jylliew haduh 12 tarik.
Ha kane ka lympung ka India kan ïakhun pyrshah ïa ka Argentina, Belgium, Germany bad ïa ka Great Britain kata mar arsien ha baroh ar ki wat jingïakhun bad ka jingïakhun kaba nyngkong kan long pyrshah ïa ka Argentina ha ka 22 tarik mynta u bnai. Kumba ka paw ka India ka la don ha ka kyrdan balai bad kamai 15 point na ki phra sien ïakhun.
Ïa kane ka kynhun yn shimti da u Harmanpreet Singh kum u kapten. Ha kawei pat ka liang u rangïalehkai shapdeng u Hardik Singh un shimti kum u Vice-Captain. Ïa ka kam ap kol yn shimti da u PR Sreejesh bad u Krishan Bahadur Pathak, ha ka bynta kaba shadien ki long u Jarmanpreet Singh, Amit Rohidas, Harmanpreet Singh, Sumit, Sanjay, Jugraj Singh bad u Vishnukant Singh.
Ha ka bynta kaba shapdeng ki kynthup ïa u Vivek Sagar Prasad, Nilakanta Sharma, Manpreet Singh, Shamsher Singh, Hardik Singh, Rajkumar Pal bad u Mohd. Raheel Mouseen. Ha ka bynta kaba shapdeng ki long u Mandeep Singh, Abhishek, Sukhjeet Singh, Lalit Kumar Upadhyay, Gurjant Singh, Akashdeep Singh, Araijeet Singh Hundal bad u Boby Singh Dhami.
Na ka liang u kapten u Harmanpreet Singh u la ong ba kynhun ki nongjied ka la pynlong ia ki nongïalehkai ba kin ïoh ïa ka lad ban ïashim bynta khamtam shabar ri namar kane ka lympung ka long shi bynta ban pynkhreh ïa ka Paris Olympics.
“Ngi khmih lynti ban ïalehkai bha namar u long u snem jong ka Olympic bad ka FIH Hockey Pro League kan dei ka lympung kaba wan ïashim bynta da ki kynhun kiba kynsai,” la ong u Harmanpreet.
“Ngi la jied ïa ka kynhun na ka bynta ban ailad ïa ki rangïalehkai ba kin ïoh ban ïashim bynta ha ki lympung ïalehkai shabar ri namar ka long kum ka jingpynkhreh na ka bynta ka Paris Olympics. Ngi don ïa ka prokram kilanmet ha SAI, Bengaluru kaba dangïaid shaphrang bad ngi donkam ban nangkiew.”
