Shillong, Jymmang 09
Ka Manika Batra ka la long ka nongïalehkai table tennis kaba nyngkong eh napoh ri India ban jam sha ka quarter finals ha ka WTT Grand Smash hadien ba ka la lah ban pynliem noh ïa ka nongïalehkai kaba bat ïa ka kyrdan ba 14 ha ka pyrthei ka Nina Mittelham.
Hadien ba ka la lah ban pynliem ïa ka nongïalehkai kaba la bat ïa ka kyrdan ba-ar ha ka pyrthei ka Wang Manyu ha ka wat kaba ar, ka Batra ka la bteng ban ïakhun tyngeh ha Saudi Arabia ha kaba ka la lah ban pynliem da 11-6 11-9 11-7 na ka bynta ban khur ïa ka jingjop pyrshah ïa katei ka nongïalehkai kaba na Germany ha ka jingïakhun kaba la neh 22 minit ha ka miet jong ka sngi Balang.
Kane ka long ka jingjop kaba nyngkong ia ka Batra pyrshah ïa ka Mittelham ha ki saw sien ki jingïakhun bad mynta kan pynkhreh ban ïakhun pyrshah ïa ka nongïalehkai kaba la bat ïa ka kyrdan ba san ha ka pyrthei ka Hina Hayata kaba na Japan.
Kumba ka paw ka Batra ka la lah ban pynliem teng ïa ka Hayata na ka bynta ban khur ïa ka takma rnong ha ka Asia Cup kaba la long ha u 2022.
“Nga sngewkmen eh halor kane ka jinglah ka jong nga ban ïalehkai bha hadien ba nga la lah ban pynliem ïa ka Wang Manyu. Kane ka jingiakhun ka long kaba kham kongsan eh ïa nga bad nga sngewkmen eh halor kane ka jingjop,” la pynpaw katei ka nongïalehkai kaba la 28 snem ka rta.
