Shillong, Jymmang 09
Ka synjuk ïalehkai lympat jong ka pyrthei ka United World Wrestling (UWW) ka la sospon ïa u rangïalehkai ka ri u Bajrang Punia hadien kaba kut jong u snem 2024. Kane ka la wan hadien ka rai jong ka NADA ban pynshitom ïa u na ka daw ba u la kyntait ban pyndep ïa ka ‘dope test’.
Wat hapdeng kane ka rai ba la shim da ka NADA, na ka liang ka Sports Authority of India (SAI) ka la mang pisa ïa u haduh T. 9 lak na ka bynta ba un leit kilan met shabar ri.
U Bajrang, uba long uwei napdeng ki nongïalehkai lympat uba paw bha jong ka ri, u la shah sospon ha ka NADA ha ka 23 tarik u Ïaïong hadien ba la phah ka jingpynbna pyrshah ïa u ha ka 18 tarik u Ïaïong.
Ban ïada ïalade, utei u rangïalehkai uba la khur ïa ka takma rnong ha ka Tokyo Olympics, u la ong ba um ju kyntait ban ai ïa ka nongmuna na ka bynta ban shah peit bniah, hynrei u la buh jingkylli ïa ki Dope Control Officer ba kin batai ha kaba ïadei bad ka jingpynkut noh ïa ka jingshah peit bniah kaba la dep.
Na ka liang u Bajrang u la pynpaw ba um shym la ïoh kano kano ka jingthoh na ka UWW shaphang ka jingshah sospon, hynrei na ka liang katei ka synjuk ïalehkai ka la dep ban buh ka jingpyntip halor katei ka jingshah sospon ka jong u.
“Ka jingshah sospon na ka bynta kane ka daw ka ban kut haduh ka 31 tarik u Nohprah jong u snem 2024,” la ong ka kyrwoh.
“Ka jingsospon da ka NADO IND na ka daw ka jingkynnoh da ka ADRV (Anti-Doping Rule Violation),” ka dei kaba la kdew shai.
Ha ka jingtyrwa u Bajrang ka long bna ka bynta 35 sngi ka jingleit kilan met ka ban sdang naduh 24 tarik u Ïaïong, hynrei kat kum ka kaiphod lyngba ka jingïalang jong ka MOC ka long ba na ka daw ka jingïatakhuh ka tarik ban leit bad katei ka jingpynbna, ha kaba u la jied ban kynriah ïa katei ka jingthmu na ka 24 tarik u Ïaïong shaduh ka 28 tarik u Jymmang mynta u snem.
Kane ka jingtyrwa ka kynthup ïa ka jingthmu da u strength and conditioning coach u Kaazi Kiron Mustafa Hasan lem bad u paralok ban ïalehkai lang u Jitender.
Na ka liang u Bajrang u la pynthikna ïa kane ka jingtyrwa ban ïoh ka jingmynjur na ka SAI.
“Nga sngewphylla ba na ka liang ka SAI ka la mynjur ïa nga. Ha ka jingshisha nga ka sangeh noh ïa kane ka jingthmu bad ïa mynta ngn ym leit shano shano ban kilanmet,” la ong u Bajrang, da kaba bynta ba u nongïasaid aid jong u un sa phah ïa ka jubab sha ka NADA.
Ha kajuh ka por ka jingïalang jong ka MOC ka Sarita Mor, kaba la ïashim bynta ha ka kyrdan ïalehkai kaba 57kg jong ki kynthei, ka la ïoh ïa ka jingmang pisa kaba T. 5,96,000 na ka bynta ban leit kilanmet sha USA ryngkat bad u kurim jong u lem bad u coach u Rahul Mann naduh 5 tarik mynta u bnai.
Ka Anshu Malik kan hap ban pynkhreh ïa ka jingïakhun jong ka 57kg na ka bynta ka lympung ïaknieh rung jong ka Paris Olympics ha ka Asian Qualifiers ka ban long ha Bishkek.
Te kumta ka jingleit kilanmet ka Anshu ha Japan, rynkat u kpa jong ka lem bad u coach u Dharamveer Malik, la mynjur ïa ka mang pisa kaba ?. 14,67,000.
Lada ka WFI ka rai ban pynlong ïa ka prokram jied kaba khatduh, ka Sarita kan hap ban ïakhun pyrshah ïa ka Anshu.
