Gaza, Jymmang:
Ka tnat shipai jong ka Israel ha ka Sngi U Blei ka la pynbna ba la ai lad biang ia ka jingrung- jingmih na khappud ka Israel bad ka Gaza sha ka phang North jong ka nongbah Gaza naka bynta ban ioh pynpoi ia ki lad jingiarap ba ki tnat bapher ki kwah ban pynpoi sha ki paidbah nongshong shnong ka Gaza bad kaba la shah khang lad noh naduh ba ki lehnoh Hamas kiba don ha Rafah ki la ther bom sha katei ka bynta khappud jong ka Gaza bad Israel bad kaba la pynlong ia ka Israel ban khang noh shi por ia utei u khappud jongka bad ka Gaza khnang ba kan ioh ban peit-thuh shwa ia ka jinglong- jingman ha katei ka bynta.
Namar kumba la iohi, ka United Nations ha kine ki khyndiat sngi ba la leit ka la pynpaw ka jingsngewkhia kaba khraw naba kam lah shuh ban pynpoi ia ki lad jingiarap bad ki jingdonkam ba kongsan sha ki paid nongshong shnong ka Gaza tang namar ka jingshah khang noh jong katei ka bynta khappud jong ka Israel bad Gaza kaba long ka jaka rung ban leit shapoh ka nongbah Gaza.
Ha kajuh ruh ka por la ong ba ki tup thma jong ka Israel ha ka Sngi Ba-ar jong ka taiew ba la lah, ki la leit ban rung sha ka thaiñ South jong ka nongbah Gaza hapoh Rafah ban ioh ban knieh hi noh ia ka bor synshar ha katei ka bynta jong ka nongbah Gaza kumba la dep thmu bad pynbeit naduh kaba sdang.
Kumta, ka Israel ka la pyntip ba ka la plie biang ia katei ka bynta khappud jongka na Kerem Shalom khnang ba ki tnat bad ki ri bapher kiba kwah ban leit ai jingiarap sha Gaza kin ioh ban iaid lynti bad ban iaid lyngba ia katei ka bynta kaba la khang noh ha ki khyndiat sngi ba la leit namar ka jingbym biang jong ka jinglong- jingman ha katei ka thaiñ.
Watla katta, ki kynhun jong ka United Nations ki la pyntip ba kim shym la lah ban pynpoi ia bun ki jingdonkam sha katei ka nongbah namar ki jingpyrkhing jong ki bor pahara ka Israel kaba la pynlong ia ki ba kin lah ban phah ne pynpoi tang ia katto katne ki jingdonkam napdeng kiba bun ba ki donkam ban pynpoi sha ki paidbah nongshong shnong ka Gaza.
