Louisiana, Jymmang:
Ha kane ka khubor kaba sngew shyrkhei la ong ba ki bor pyniaid ki la ioh bat noh ia uwei u khynnah uba rah ia ka suloi heh bad uba thmu ban leit rung bad thombor ia kat kiba don hapoh ka iingmane ha ka nongbah Louisiana.
Kane ka la jia ha ka iingmane St. Mary Magdalen Catholic Church hapoh Abbeville, ha kaba ki don kumba 60 ngut ki khynnah rit kiba dang leit sha ka jingpdiang ‘Communion’ kaba nyngkong.
Hynrei la ong ba katba kitei ki khynnah ki dang pynkhreh ban leit shakhmat ban leh ia ki niam ki rukom kumba ju dei, ki kmie ki kpa jong kitei ki khynnah kynsan ki la iohi ia utei u khynnah 16 snem uba rah ia katei ka suloi heh bad ki la ia bat noh ia utei u khynnah bad ki la knieh pynstet ia katei ka suloi kaba u rah haduh ba ki pulit kin da wan ban shimti bad rah noh syndon ia utei u khynnah.
Ki bor pyniaid jong katei ka iingmane hadien katei ka jingjia, ki la iathuh ba ha ka por ba dang pyniaid ia katei ka jingpdiang ‘Communion’ ha katei ka sngi, la don kiba plie tuh ia ka jingkhang kaba shadien jong katei ka iingmane da ka jingthmu ban leh kam sniew ne leh eiei ha katei ka jaka. Kat haduh mynta ym pat shym la lap ia kiba thmu bad kiba don kti ban ia suh buit halor katei ka kam thombor da kaba pynshlur ia utei u khynnah 16 snem ba un leit ban thombor syndon hapoh ka iingmane.
Ia utei u khynnah la ioh ban kem noh da ki pulit ka Abbeville bad la iathuh ba u la don 16 snem ka rta bad kumta ki la bat noh ia u hapoh ka thanat jong ka Abbeville na ka bynta ka jingtohkit kaba bniah haba iadei bad katei ka jingthmu thombor jong u ha katei ka sngi.
Ha kajuh ka por ruh la ong ba ka tnat FBI ka dang ialeh ban wad bniah bad ban bud-dien ia kiba suhbuit bad don kti baroh ha katei ka kam kaba la wanrah jingma bad pynsyier ia kiba bun ki paidbah riewngeit kiba thmu ban leit sha katei ka iingmane ban shakri kumba ju long man ka Sngi U Blei.
