Yemen, Jymmang:
Ki lehnoh Houthi na Yemen ha ka Sngi Balang ki la pyntip ba ha kane ka por ki dang peit thuh bha ia ka jhad thma jong ka US bad kumjuh ruh ka jhad kit mar jong ka US kaba don ha Red Sea bad ki la pyntip ruh ba ki dang ap ia ka por ba kin thombor ia ki jhad ka US kiba don ha katei ka bynta jong ka duriaw kaba don hajan Yemen.
Katei ka jingleit thombor jong kitei ki lehnoh ia kat ki jhad kiba iaid lyngba na katei ka bynta jong ka duriaw Red Sea, ka long naduh ba ka Israel ka la leit ban hiar thma ia ka Gaza. Kumta kitei ki lehnoh ki pyrshah jur ia katei ka jingleit hiar thma jong ka Israel pyrshah ia ki lehnoh Hamas kiba la synshar ia ka nongbah Gaza mynta da ki phew snem.
Haba iakren bad ki lad pathai khubor, u nongrah ktien jong ka Houthi- u Yahya Sarea u la ong ba ka Houthi ha kane ka por ka phai khmat sha katei ka jhad thma jong ka US kaba kyrteng ka ‘Maysun’ bad kaba don ha ka bynta jong ka Red Sea ha ryngkat bad kiwei de ki jing-iada jong ka US kiba kynthup ia ki ‘namding bad kiwei kiwei.
La ong ba ka Houthi ka thmu ban ther bom ia katei ka jhad ‘Destiny’ jong ka US ruh namar ka dei ka jhad kaba la leit poi sha ka jaka ïeng jhad jong ka Israel sha Eilat ha ka 20 tarik u Iaiong.
Kumta, la ong ba naduh ba ki Houthi ki la sdang ban pynthud ia kat ki jhad kiba leit poi sha katei ka bynta jong ka duriaw, ki jhad jong ki ri bapher ki la hap ban kiar noh ia katei ka bynta bad ki hap pat ban leit iaid kyllaiñ na kiwei pat ki lynti iaid ban pyllait ia ki na ki jingma jong ki kam thombor ka Houthi.
Kumjuh ruh la ong ba ka United States bad ka Britain ha kine ki khyndiat por ba la leit, ki la ther kylla sha Yemen, kum ka jingmaham ia ki lehnoh Houthi ba kim dei ban pynthut ia ki jhad jong ki kiba leit poi ne iaid lyngba ia katei ka bynta jong ka duriaw kumba ki ju leh man ka por naduh ba la iaid ka thma hapdeng ka Israel bad ki Hamas hapoh Gaza.
