Shillong, Rymphang 17
U Sanvert B. Kurkalang u la pynpaw ba ka long ka burom kaba khraw haba u ïoh ban mihkhmat ïa ka Jylla ha ki lympung ïalehkai kriket bapher bapher bad kane ka la wan hadien ba la pynbna ban shongthait noh na ka kam ïalehkai.
Une u nongkawang bol (fast bowler) bad kum u nongtied, u la long uba paw hapoh ka kynhun ki nongjied jong ka Meghalaya Cricket Association kumba katto katne snem ha shwa ba un ïoh ban mihkhmat nyngkong eh ïa ka kynhun ïalehkai (senior) ka Jylla ha u Naiwieng jong u snem 2022 pyrshah ïa ka Delhi ha Kolkata ha ka lympung ïalehkai Vijay Hazare Trophy.
Une u rangïalehkai uba la 31 snem ka rta u la ïoh ban mihkhmat ïa ka Jylla ha ki lai tylli ki jingïalehkai jong ka Ranji Trophy, saw sien ha ka Vijay Hazare Trophy bad lai sien ha ka Syed Mushtaq Ali Trophy.
U Sanvert u la lah ban ïalehkai bha mynta u snem ha ka Ranji Trophy ha kaba u la ïoh ban shim 3 wiket bad ai 19 run pyrshah ïa ka Arunachal Pradesh ha u Kyllalyngkot. Kumjuh ha u Naiwieng mynshem snem u la shim 2 wiket bad ai 48 run pyrshah ïa ka Maharashtra.
Kumba ka paw u Sanvert u la ïalehkai kumba katto-katne snem na ka bynta ka Langsning CC ha ka Shillong League shwa ba un leit ïasoh sha ka Rangkynsai CC na ka bynta ka aïom ïalehkai 2023-24.
Ha ka shithi ba u la phah sha ka MCA ban pynbna ïa ka rai ban shongthait noh na ka kam ïalehkai, u Sanvert u la ai khublei ïa kane ka synjuk ïalehkai kaba la plie lad ïa u ban mihkhmat ïa ka Jylla bad kumjuh ïa ka synjuk. “Nga ai khublei ïa kane ka synjuk ïalehkai kaba la plie lad ïa nga ha ka kam ïalehkai, kumjuh ïa ki para nongïalehkai.”
U la pynpaw ba kum ki rangïalehkai kiba dangkhie dansan ki don hok ban ïalehkai bha na ka bynta ka Jylla bad kumjuh ïa ka synjuk hi baroh kawei. Hynrei kum u rangïalehkai, u don ïa ka jingangnud ba u dang ïai don bynta bad ka kynhun ïalehkai ka Jylla la ka long ha ka ban ai jinghikai kum u coach lane kum u manager ban noh synñiang ha kino kino ki lympung ïalehkai.
