Shillong, Jymmang 17
Ka khlur ïalehkai tennis kaba la bat teng ïa ka kyrdan ba nyng-kong ha ka pyrthei ka Iga Swiatek, ka la bteng ban ïalehkai bha ha ka Italian Open, ha kaba ka la lah ban jam sha ka final hadien ba ka la lah ban pynliem ïa ka nongïalehkai na America ka Coco Gauff da 6-4, 6-3.
Ha wat kaba nyngkong jong ka jingïakhun semi-final, ka Swiatek ka la pyrshang ban ïalehkai bha pyrshah ïa ka Gauff ha kaba ka lah ban tam da 2-0. Hynrei ha ka wat kaba ar ka Gauff ka la wanphai da ka jingkhlaiñ bor na ka bynta ban pynïakhaid mar 4-4. Hynrei ha kaba kut ka Swiatek ka la lah ban jop syndon da 6-4.
Da ka jinglah ban rah ïa ka nam jop kaba 11 sien ha ka madan dewbyrtha, ka Swiatek ka don jingkyrmen ba kan kynjoh biang sha katei ka nam lahduh na ka bynta ban long ka nongïalehkai kaba lai ka ban jop ar sien ha Madrid-Rome, na ka bynta ban bud ïa ki dienjat ka Dinara Safina kaba la jop ha u 2009 bad ka Serena Williams ha u 2013.
