Shillong, Jymmang 17
Ka Barcelona ka la rai ban weng noh ïa u Xavi hadien ba une u coach um shym la lah ban pynlong ïa kane ka klob ban rah ïa ka nam lahduh ha ka lympung La Liga mynta ka aïom.
Une u coach, 44 snem, ka rai u la pynbna ha u Kyllalyngkot bad un ïeh noh ïa kane ka klob ha kaba kut ka aïom ïalehkai, hynrei na ka liang u President kane ka klob u Joan Laporta u la rai ba un bteng biang ïa ka kam na ka bynta jong u.
Hynrei katkum ka jingpynpaw u Xavi ha ki lad pathai khubor dangshen ka la pynbitar ïa ki bor pynïaid kane ka klob bad mynta ka la rai ban ïakhlad noh bad une u rangïalehkai shapdeng barim ka Spain.
Te kumta la rai ba u manager ka Barcelona (B team) u Rafael Marquez un shimti ïa kane ka kam kum u manager ba thymmai.
Ha shwa ba kan khur ïa ka jingjop ha ka sngi Palei ha Almeria, u Xavi u la pynpaw ba ka long kaba eh ban ïatynjuh bor ha ka liang ka jingbei tyngka bad ka Real Madrid lem bad kiwei ki klob kiba kynsai ha Europe.
“Nga sngew ban ong ba ki paidbah nongkyrshan ka Barca ki dei ban sngewthuh halor kane ka jingeh kaba khraw jong ka klob ha ka liang ka ïoh ka kot na ka bynta ban ïatynjuh bor bad ka Real Madrid ha Spain lem bad kiwei ki klob ha Europe,” u la bynrap.
“Ngi hap ban pynïahap halor kane ka bynta. Kam mut ba ngim kwah ban ïakhun ne ban ïakhun na ka bynta ki trophy. Ka dei kane ka jingeh ba ka Barca ka ïakynduh. Te kumta ngi donkam ban pynkhlaiñ bad ban ap ïa ka por.”
Ka Real kaba la dep rah lypa ïa ka nam lahduh ha ka lympung La Liga mynta ka kynti, ka la rung sha ka final jong ka Champions League bad kan soi u rangïalehkai shakhmat ka France u Kylian Mbappe na ka Paris St-Germain ha kane ka aïom lyiur.
Wat la ka dangsah sa ar sien ïakhun, hynrei ka Barcelona ka dangduna haduh 14 point ïa ka Real Madrid, kaba la bat ïa ka kyrdan ba hakhlieh.
Kum ban shu pynkynmaw, u Xavi u la shimti ïa ka Barca ha u Naiwieng jong u snem 2021 hadien ba u la mih noh na ka klob kaba na Qatar ka Al Sadd bad u la lah ban btien lynti ïa ka Barca ban rah ïa ka nam lahduh ha katei ka lympung kaba ha Spain ha ka aïom ïalehkai 2022-23.
Kane ka kynhun ba khlaiñ bor na Spain ka la shah rem noh ha ka quarter final jong ka Champions League ha ka PSG.
