Shillong, Jymmang 21
U rangïalehkai shadien barim ka Germany u Karl-Heinz Schnellinger, uba la mihkhmat ïa ka ri lajong haduh saw sien ha ka lympung ïalehkai World Cup, u la khlad noh ha Italy ha ka janmiet jong ka Lah Sngi U Blei ha ka rta kaba 85 snem.
Ïa kane la pynbna da ka klob barim jong u ka Cologne ha ka Sngi Ba-ar.
U Schnellinger, uba la ïalehkai teng na ka AC Milan bad ka AS Roma, u la long u rangïalehkai ba paw ha ki snem ba la leit bad u la long u rangïalehkai uba kynsai.
U Schnellinger uba la ïoh ban thep shi kol ha shwa ban kut ka jingïalehkai na ka bynta ban pynïakhaid ïa ka West Germany ha shwa ba kan shah rem da 4-3 kol ha ka jingïakhun semi-final pyrshah ïa ka Italy ha ka World Cup 1970.
Kan dei ka sien kaba saw na ka bynta u Schnellinger bad kaba khatduh ha ka World Cup hadien u snem 1958, 1962 bad 1966. U la ïoh ban thep shi kol ha ki 47 sien ki jingïakhun ha ki lympung shabar ri.
Kumba ka paw u Schnellinger u la pynlut khambun ka por ha Italy bad la tip ruh ïa u kum u “Carlo il Biondo” (the blond Karl). U la lah ban pynurlong ban rah ïa ka nam lahduh ha ka Serie A na ka bynta ka Milan ha u 1968 ha shwa ba un ïadon bynta ban rah ïa ka European Cup ha u 1969.
