Bratislava, Jymmang:
U Symbud Myntri Rangbahduh ka Slovak- u Robert Kalinak ha ka Sngi Nyngkong u la pyntip ba ka jinglong jingman jong u Myntri Rangbahduh katei ka ri, ka la kham biang bad la ong ba u Robert Fico u la lait na ki jingma kiba ap ia ka jingim jong u hadien ka jingshah siat mynshem taiew.
U Robert Fico u la poi thiah hospital ha ka Sngi Balang mynshem taiew hadien ba u la shah siat haduh 4 kuli ha uwei u runar katba u dang mih na ka jingialang bad ki Myntri sorkar jong u ha katei ka sngi.
Wat la katta, la ong ba ka jinglong jingman jong ka met jong u pat kam pat khlaiñ bha namar ka jingmynsaw bad jingshitom ka la jur palat bad uwei na ki kuli kiba la ksam ia ka met jong u, u dei na ki bynta jong ka kpoh bad kumta kan dang shim por ia u ba un lah ban iaid ban ïeng kumba ju long barabor.
