Washington, Jymmang:
Ka United States ha ka Sngi Nyngkong, ka la phah ia ka khubor sngewlem sha ka Iran halor ka jingduh noh ia u President ka ri- u Ebrahim Raisi bad kumjuh ruh ia kiwei pat ki nongialam ba hakhlieh jong katei ka ri kiba kynthup ia u Myntri ka tnat kam bar ri jong ka Iran- u Hossein Amirabdol-lahian bad 2 ngut ki dkhot jong ka kynhun ba la buh kyrpang ban leit synran ia kitei ki nongialam ha katei ka sngi ba ka liengsuiñ kaba ki shong ka la thud shiteng suiñ bad leit hap bakla noh.
Kumta, la ong ruh ba katba ka Iran ka dang pynkhreh ban jied bad thung noh da uwei pat u President ha ka jaka jong u Raisi, ka US ka la pyntip ba ka ïeng skhem ruh ban ai jingkyrshan ia ka hok bad ka jingshngaiñ ki paidbah nong Iran haba iadei bad ka jingjied ia u nongialam uba thymmai u ban ialam ia ka Iran ha kine ki sngi ban wan.
Wat la ka Iran ka iohi ia ka US kum ka nongshun jongka, hynrei la ong ba ka US kam shym ieh noh ne klet ia ki paidbah ka Iran bad kumta ka la pynpaw ia ka jingkyrshan jongka bad ka la kular ruh ban peit-thuh ia ka rukom pyniaid ki bor pyniaid ka Iran haba iadei bad ka hok bad ka jingshngaiñ jong ki paidbah nongshong shnong.
La ong ba ka US bad Iran ka la jan poi sha u pud jong ka thma la bun sien namar ka jingiakynad hapdeng kitei ki ri ka ju jia khah- khah bad ki nongialam jong kitei ki ri kim lah ban pyniadei kumba ki lah ban pyniajan bad kiwei pat ki ri.
