Shillong, Jymmang 21
Ka Umphrup Sports Club ka la rah ïa ka nam lahduh ha ka lympung ïalehkai phutbol ba la tip kum ka 1st Raid Nongbri Knockout Football Tournament ba la pynlong da ka shlem treikam ka Executive Committee Raid Nongbri, Umphrup, Hima Khyrim hadien ba ka la lah ban pynliem ïa ka Laitdiengsai Sports Club da 3-2 kol.
Ha shwa ka jingïakhun final ki samla rangbah kaba la long ha 18 tarik mynta u bnai, ka la don ka jingïakhun phainal da ki kynhun jong ki samla kynthei kata ka Thadan Sports Club kaba la jop ïa ka Thangsning Sports Club lyngba ka tie-breaker bad kumjuh jong ki heprit shynrang kiba hapoh 14 snem rta.
Kum ban shu kdew ba kane ka dei ka sien ba nyngkong ïa ka Raid Nongbri kaba kynthup 12 tylli ki shnong ban pynlong ïa kane ka lympung ïalehkai ha ryngkat ka thong ban wanrah ka jingïatylli hapdeng ki shnong khamtam ki samla kane ka Raid.
Ha katei ka sngi la ïa donlang ruh da u Syiem Khynnah ka Hima Khyrim, u Pa’iem Habapan Sing Syiem kum u Kongsan ha ka jingïadonlang ki nongïalam ka Raid, ki nongïalam shnong nalor kiwei pat.
Ka lahduh ha kane ka sngi ka la ïoh rah ïa khusnam pisa ba T.30 hajar tyngka ryngkat ka Trophy katba ka kynhun kaba la wan ba-ar ka la ïoh ïa ka khusnam pisa kaba T.15 hajar tyngka lem ka Trophy na ka liang ki samla shynrang.
Ha ka liang ki samla kynthei, ka Thadan Sports Club kaba long ka lahduh ka la ïoh rah ïa ka song pisa kaba T.10 hajar tyngka ryngkat ka Trophy katba ka kynhun kaba wan ba-ar pat T. 5 hajar tyngka lem ka Trophy.
Nalor kine, la sam ruh ïa ki khusnam sha ki nongïalehkai kiba la ïalehkai bha ha kane ka lympung ha kaba na ka liang ki kynthei ïa ka khusnam Youngest Player la ïoh da ka Balahunshisha Mawthoh na ka Umtngew SC, Best Player sha ka Naphidakmen Kshiar jong ka Thadan SC, Best Goalkeeper sha ka Larijanai Kshiar na ka Thadan SC bad Top Scorer sha ka Dahunshisha Mylliemngap jong ka Thangsning SC.
Ha ka liang ki samla shynrang pat, ïa ka khusnam Man of the Match jong ka jingïakhun phainal la ïoh rah da u Wanpyniar Nongbri ka Umphrup SC, Best Player of the Tournament sha u Lam Kharum -nuid ka Laitdiengsai SC, ka khusnam Best Goalkeeper sha u Nangkitboklang L. Nongbri ka Umphrup SC bad Top Scorer sha u Ïohbor Nonglyer ka Laitdieng-sai SC.
