Shillong, Jymmang 22
Ka lympung ïalehkai State Level Inter-School Athletic Meet 2024 ka la sdang ha ka 22 tarik u Jymmang 2024 S.A.I Training Centre, Shillong ha kaba la wan ïashim bynta da 809 ngut ki nongïalehkai na baroh 12 tylli ki district jong ka Jylla.
Kane ka la wan hadien ba la lah ban pyndep ïa baroh ki lympung ïalehkai District Level Athletics Meet ha baroh 12 tylli ki district. Napdeng kitei ki 809 ngut, 397 ngut ki dei ki shynrang bad 412 ngut ki kynthei kiba la shah jied lyngba ka jinglah ban pynpaw ïa ka jingtbit jong ki ha kine ki khyndiat sngi ba la dep.
Ïa kane ka lympung la wan ban plie da u Working President ka Meghalaya State Olym-pic Association u Bah John F. Kharshiing ha kaba la ïadon lang u rangïalehkai Olympic barim na Australia u Ian Cambell ha ryngkat u Secretary ka MSOA u Bah Finely L. Pariat, ki ophisar ka tnat ïalehkai jong ka Sorkar Jylla kiba kynthup ïa u Assistant Director Bah Khroobok Passah, ka Sports Officer Kong Darlyne Khonglam bad kiwei kiwei.
Ka jingplie ïa kane ka lympung ka long tang dep rukom namar ki khynnah ki la hap ban ïeng na ki jaka shong bad kim shym la ïoh ban ïaid march pass sha madan namar ka jing pynthut u slap ba jur uba la neh kumba ar kynta, hynrei ïa ki jingïakob mareh la lah ban pynïaid beit shakhmat.
Ha kane ka lympung ïalehkai ka ban neh haduh lai sngi kynthih, la phiah ha lai tylli ki kyrdan ïalehkai kata ka Under-14, Under-16 bad Under-18 ha ka liang ki shynrang bad kynthei.
Nalor ki jingïakob mareh bapher bapher, kiwei pat ki jingïalehkai ki kynthup ïa ka jingkawang sum (Javelin), Shot Put, Discus Throw, High Jump, Long Jump bad kiwei kiwei.
Ïa ki kyntien pdiang sngewbha la ïoh na ka Sports Officer jong ka tnat Kong Darlyne Khong -lam bad hadien kane ka la don ruh ka jingbam smai da ki nongïalehkai.
Lah ban pynkynmaw ha ka State Level Inter-School Athletic Meet jong u snem ba la lah, ka West Jaiñtia Hills ka la ïoh ban bat ïa ka nam lahduh hadien ba ka la lah ban khur 14 tylli ki takma ksiar, 6 ki takma rupa bad 3 ki takma rnong. Ïa ka kyrdan ba-ar la bud sa ka Ri Bhoi District kaba la khur 11 tylli ki takma ksiar, 8 ki rupa bad 13 tylli ki takma rnong. Ka West Khasi Hills ka la wan balai da kaba khur 8 tylli ki takma ksiar, 6 ki rupa bad 11 ki takma rnong.
Haba phai sha ka East Khasi Hills kaba la biang nadong shadong ha ka jingdon ïa ki jaka ïalehkai ba paka, ka la wan haduh ka kyrdan ba hynñiew da kaba khur 5 ki takma ksiar, 4 ki rupa bad 6 tylli ki takma rnong.
