Beirut, Jymmang:
Ka tnat iada jong ka Lebanon ka la pyntip ba ha ka Sngi Nyngkong, 5 ngut ki dkhot jong ka Hezbollah ki la kyllon iap bad kumba 5 ngut pat kiba mynsaw ha ka jingther bom ki liengsuiñ thma ka Israel sha katto katne ki shnong jong ka phang Southern ka Lebanon. Katei ka tnat jong ka Lebanon ka la pyntip ba ki shipai ka Israel ki la leit ban thombor sha saw tylli ki shnong kiba don sha ka thaiñ Shathie-sepngi jong ka Naquora, ha kaba 2 ngut ki dkhot ka Hezbollah kiba don ha katei ka thaiñ ki la kyllon iap ha katei ka jingther bom jong ki liengsuiñ ka Israel bad kumjuh ruh 3 ngut pat ki la mynsaw. Kumjuh ruh na ka liang ka Israel, ha katei ka sngi ka la pyntip ba ki shipai jong ka ki la ioh ban leit thombor sha ki katto katne ki shnong kiba don sha ka thaiñ Sha-thie-mihngi jong ka Lebanon.
khamtam ha ka shnong Mays al-Jabl, ha kaba 2 ngut ki dkhot ka Hezbollah ki la kyllon iap ha katei ka jingther bom ki liengsuiñ thma ka Israel. Nangta ruh ha ka shnong al-Qusayr kaba long ka bynta khappud jong ka Lebanon bad ka Syria sha ka phang Mihngi jong ka Lebanon, ki shipai ka Israel ki la ioh ban thombor bad shim ia ka jingim jong uwei u dkhot ka Hezbollah bad kumjuh uwei pat uba mynsaw lang ha katei ka jingjia.
Namar la ong ba ka Israel ha katei ka sngi, ka la phah ia ar kynhun ki liengsuiñ thma ban leit thombor sha kitei ki ar tylli ki bynta jong ka Lebanon, ha kaba ka la ioh ban shim ia ka jingim jong 5 ngut ki lehnoh Hezbollah bad 5 ngut pat kiba mynsaw ha katei ka jingthombor jong ka Israel ha katei ka sngi.
Ha kajuh ka por, na ka liang ka Hezbollah ruh ka la pyntip ba ki kynhun jong ka ki la ioh ban thombor bad kput ia ki katto katne ki bynta jong ka Israel.
Kumta, la ong ba ka jingiakynad hapdeng ka Lebanon bad ka Israel ka la neh slem bad ka la sdang naduh ka por ba ka Israel ka leit ban kput ia ka kynhun lehnoh Hamas da kaba leit hiar thma sha Gaza namar ka jingleh jong ki lehnoh Hamas ha ka 7 tarik u Risaw, 2023.
Haba iadei bad kane, la ong ba ka jing-iakynad ba sop-sop hapdeng ka Israel bad ka Lebanon ka la shim ia ka jingim jong palat 400 tam ki briew bad lada ai jingkheiñ thik-pa-thik ka la kot sha 477 ngut kiba la khlad sha ka liang jong ka Lebanon, kiba kynthup ruh ia 301 ngut ki dkhot ka Hezbollah bad 89 ngut pat kiba long tang ki paid nongshong shnong ka Lebanon bad kiba la ngat bad shah ktah lang ha katei ka jingthombor jong ka Israel sha Lebanon na ka por sha ka por.
