Shillong, Jymmang 22
Ka rephri ba paw ka Jylla, ka Ri-ïohlang Dhar ka la wanphai sha la ïing ha ka sngi Ba-ar hadien ba ka la ïoh ban don bynta ha ka lympung ïalehkai AFC U-17 Women’s Asian Cup 2024 kaba la long ha Bali, Indonesia.
Ka Ri-ïohlang ka long tang marwei na ka ri napdeng ki 22 ngut ki rephri kiba la don bynta ha katei ka lympung kaba la sdang naduh 6 haduh 19 tarik mynta u bnai.
Ka Ri-ïohlang kaba long ka FIFA level assistant referee, ka la ïoh ban leit kylleng ki ri ka dewbah Asia ha kine ki khyndiat snem ba la lah.
Ha katei ka lympung kaba la long ha Indonesia ki la don phra tylli ki ri kiba la ïashim bynta, kynthup ïa ka Japan kaba la wan ba-ar ha u 2019, North Korea, China, South Korea, Thailand, Australia bad ka Philippi. Ka North Korea ka long la lahduh ha ka sien kaba saw hadien ba ka lah ban pynliem noh ïa ka Japan da 1-0 kol ha ka jingïakhun final. Kine ki ar tylli ki ri kiba la rung sha ka final lem bad ka South Korea kaba la wan ha ka kyrdan balai, ki la ïoh rung sha ka U-17 Women’s World Cup ka ban sa long shen mynta u snem.
Te kumta ka Ri-ïohlang ka la ïoh ban pynïaid ïa ka jingïalehkai ‘third place’ bad kane ka jingïakhun ka long kaba kham itynnad bha namar baroh ar ki kynhun ki don hapeng ka jingïaknieh ban ïoh rung sha ka U-17 World Cup.
“Nga sngewkmem eh ban ïoh ïa kum kane ka lad ban don ha ka ban pynïaid ïa ka jingïalehkai third place, kaba long kaba kongsan namar baroh ar ki kynhun ki la ïakhun ban ïoh rung sha ka U-17 World Cup ka ban long mynta u snem. Te kumta ka long kaba kham eh bha ban ïa ka final,” la pynpaw ka Ri-ïoh.
Kane ka samla kaba don ha MLP Battalion, ka la long kaba nyngkong eh ban ïoh ïa ka kyrdan FIFA Assistant Referee ha u 2018. “Watla nga la bat ïa kane ka kyrdan, hynrei nga dangïai bteng ban nangkham pynjanai ïalade ha ka ban pynïaid ha manla ki jingïalehkai,” ka la bynrap.
“Wat la nga la bat ïa kane ka kyrdan, hynrei kane kam mut ba nga la biang nadong shadong. Ngam long kaba janai namar ka dangdei tang ka briew bad nga tip skhem ba ki don shibun ki jingbakla, hynrei nga dangdon hapdeng ka jingïaid lynti ka jong nga bad ban pynlong ïa lade kaba khlem don ki jingduna,” ka la bynrap.
Watla ki don bun kiba kyrshan ïa nga la ka long na kiba haïing hasem, ki lok ki jor abd kiwei, hynrei ki don ruh kiba kwah ban pynhiar arsut ïa ka.
Hynrei hapdeng ka kam kaba khia, hynrei nga ïeh ïa kine baroh ha India hashwa ba ngan leit sha Bali namar ngam kwah ba kine ki jingpynkiang kin ktah ïa nga ha ka ban pynïaid ïa ki jingïalehkai bad nga dei ban long kaba khlaiñ ha ka jingmut jingpyrkhat,” la ong ka Ri-ïoh.
Watla ka la wanphai sha la ïing, ka la ïoh biang sa kawei ka kam kaba hap leit sha Goa na ka bynra ka second division jong ka Indian Women’s League (IWL 2).
