Shillong, Jymmang 23
Ki hat-trick ba la ïoh da u Ademola Lookman kia la biang pura ïa ka Atalanta ban pynliem noh ïa ka Bayer Leverkusen da 3-0 kol na ka bynta ban rah ïa ka nam lahduh ha ka Europa League ha ka step jong ka Sngi Palei ha Aviva Stadium kaba ha Dublin.
Kane ka dei ka sien ba ar ïa katei ka klob na Italy ban rah ïa ka jingjop ha ka lympung ïalehkai kaba heh hadien ba ka la lah ban pynliem ïa katei ka lahduh na Germany hadien ba ka la long ka kynhun kaba khlem shah rem ha ki 51 sien ïakhun.
Utei u rangïalehkai shakhmat na Nigeria, uba kham ha shwa u la ïakynduh jingeh ha ka lympung ïalehkai jong ka English Premier League na ka bynta ka Everton, Fulham bad ka Leicester City, ula lah ban pynpaw ïa ka jingtbit ha Italy na ka bynta ban pynurlong ïa ka Atalanta hapoh ka jingïalam u coach u Gian Piero Gasperini ban kynjoh sha ka thong.
Ha kane ka jingïakhun u Lookman u la ioh ban pynkhih jar nyngkong eh ha ka minit kaba 12 bad une u rangïalehkai shakhmat u la pynbud biang ïa ka kol kaba ar ha ka minit kaba 26 na ka bynta ban tam 2-0 kol ha ka kylla step na ka daw ka jingbym lah ban pynphai da ka liang pyrshah.
Hadien katto katne por ba la bteng biang ïa ka jingïakhun jong ka kylla miet, u Lookman u la thep biang sa shi kol ha ka minit kaba 75 na ka bynta ban ïoh syndon ïa ka hat-trick. Haduh kaba kut ka Leverkusen kam shym la lah ban pynpaw ba ka la hap ban mad ïa ka jingshah rem. Te kumta ka Atalanta ka la lah ban pynurlong ïa ka jingangnud kaba la iai ap khmat lynti ha ki 61 snem na ka bynta ban khur ïa ka trophy naduh ba ka la rah ïa ka nam jop ha ka Italian Cup ha u 1963.
