Ottawa, Jymmang:
Katkum ki khubor, la ong ba 3 ngut ki la khlad noh kynthup ia uwei u khynnah rit hadien ka jingjia shah dung tari ha ka jing-iakynad ha Montreal jong ka ri Canada ha kine ar-sngi ba la leit.
Katkum ka kaiphod na ki pulit ka Montreal, la ong ba ki la ioh jingtip halor katei ka jingjia lyngba ka phone kaba la poi sha u nombar 911 ha ka por kumba 7 baje jong ka janmiet Sngi Balang halor ka jingïakynad hapdeng 15 ngut ki briew kiba don ha ka surok Rachel Street kaba don hapdeng jong ka Saint-Andre bad ka Mentana hapoh Plateau-Mont-Royal.
Ki pulit ki la iathuh ruh ba kitei kiba don kti ha katei ka kam thombor pat ki la lait phet noh na katei ka jaka shwa ba ki pulit kin wan poi. Nalor nangta ki la iathuh ba katei ka jing-iakynad kam shym don jingiadei bad kano-kano ka kynhun lehnoh ne ka kynhun runar bad ia ki jingtip ba bniah yn sa lah ban tip tad ynda la ioh ban tohkit bniah shwa lyngba kitei kiba la mynsaw bad ïadon bynta ha katei ka jingiakynad.
Kumta, la ong ba ka long kaba sngewsih ba katei ka jing-iakynad ha katei ka sngi ka la wanrah syndon ia ka jingduh noh haduh 3 ngut ki mynsiem briew, kynthup ia u khynnah 15 snem ka rta.
Wat la katta, la ong ba ki la don kumba 7 tylli ki jingjia shah pyniap hapoh Montreal tang hapoh jong kine ki 10 sngi mynta.
