Cairo, Jymmang:
Ki shipai ka Israel ha ka Sngi Palei ki la leit ban ther bom sha kylleng sawdong jong ki bynta ka nongbah Gaza ha kaba ki bor pyniaid ka Palestine ki la pyntip ba ki don haduh 50 ngut ki paidbah kiba la duh ia ka jingim ha katei ka sngi na ka jingleit ther bom naphang jong ki shipai ka Israel khamtam ha ka thaiñ Shathie jong ka Gaza hapoh ka nongbah Rafah.
Namar la ong ba ki tup thma jong ka Israel ki la leit poi lut sha ka nongbah Rafah jong ka Gaza katba ka Israel ka dang ieleh ban ñion ia ki lehnoh Hamas kiba don ha katei ka nongbah bad ha kaba ka Israel ka la pynksan ruh ba dei tang ha katei ka bynta ba dang don ki lehnoh Hamas kiba sah namar ka Israel ka la dep pynkhuid lut sha kiwei kiwei ki bynta jong ka Gaza.
Ia mynta hi, la ong ba ki shipai ka Israel ki la sdang ban leit rung sa sha ki bynta West jong katei ka nongbah Rafah bad ki dang don ha ki bynta khappud jong ka Yibna, kaba long ka thaiñ kaba bun paid bha bad kumta ka Israel kam pat shym la phah hiar thma ne phah ther bom ia ki shipai jongka ha katei ka bynta ia mynta.
La ong ba ki paidbah nongshong shnong jong katei ka thaiñ ki la ïohsngew ia ka jingbthei bad ka jingsawa jong ki bom bad ki la iohi ruh ia ka tdem kaba rben kaba kiew shalor suiñ na kitei ki thaiñ ba ki shipai ka Israel ki la leit ban rung bad hiar thma.
Nalor kata, la ong ba ka jingleit hiar thma jong ka Israel sha ki thaiñ North bad South jong ka Gaza ha une u bnai, ka la pynkylla phet-wir lut ia ki paidbah nongshong shnong jong kitei ki thaiñ namar ki la hap ban mih noh na katei ka bynta bad ban ieh noh ia ki iing-ki sem jong ki bad katei ka jingleh jong ka Israel, ka la khang lad noh ruh ia ki lad jingiarap ba kiwei pat ki ri bad ki tnat bapher bapher jong ka pyrthei ki kwah ban pynpoi sha ki paidbah nongshong shnong jong ka Gaza. Ka Israel ka la sdang ban leit hiar thma sha Gaza naduh ka sngi ba ki Hamas hi ki leit ban thombor bad hiar thma ia ka Israel ha ka 7 tarik u Risaw jong u snem 2023 ba la leit, ha kaba ki la rah bor ruh palat 250 ngut ki briew na Israel kiba kynthup ia ki paidbah nongshong shnong ka Israel bad kumjuh ruh ia kito kiba shu leit shong shipor ne leit jurip sha Israel ha katei ka por.
