Shillong, Jymmang 24
U coach ka kynhun ïalehkai ka ri u Igor Stimac u la khmih lynti ïa ka jingwan poi bun ki paidbah ha Salt Lake Stadium kaba ha Kolkata na ka bynta ka jingïalehkai jong ka India ha ka jingïaknieh rung World Cup (qualification) pyrshah ïa ka Kuwait ha ka 6 tarik u Jylliew ka ban long ruh ka jingïalehkai bar ri kaba khatduh jong u kapten ka kynhun u Sunil Chhetri.
U Chhetri uba la noh synñiang haduh 19 tylli ki snem ha ki jingïalehkai bar ri, u la lah ban thep haduh 94 kol na ka bynta ban long kum u nongthep kol ba kynsai. Da ka jingïoh ban ïalehkai haduh 151 sien, u la ïoh ban bat ïa ka rekod kum u rangïalehkai uba paw na ka bynta ka kynhun ïalehkai ka ri.
Lada ka India ka lah ban pynliem ïa ka Kuwait kan long kum ka jingkular ban pynurlong na ka bynta ban ïoh rung sha ka wat balai ha kane ka World Cup (qualifiers) bad kan long kum u mawjam na ka bynta ka kynhun ïalehkai phutbol ka ri.
“Ngi la don lypa ha ki jingmut jingpyrkhat namar kane ka jingïakhun ka long kaba kham kongsan ban ïaid ïa ka jingjop na ka bynta ban ïoh rung sha ka wat ba lai ha ka sien kaba nyngkong eh bad ruh kan dei ka jingai khublei kaba khatduh ïa u Sunil Chhetri. Te kumta ngi khmih lynti ba ka Salt Lake Stadium kan dap smam da ki paidbah,” la ong u Stimac uba la don ha Bhubaneswar na ka bynta ban ai jinghikai ïa ka kynhun ïalehkai ka ri kaba dang don hapdeng ka jingpynkhreh.
“Nga sngew thikna ba ki paidbah nongkyrshan jong ngi na kylleng ki jaka kin poi sha Kolkata na ka bynta ban pynurlong ïa ka kynhun ban ïoh ïa ka jingjop bad ruh ban ai khublei khatduh ïa u Sunil. Nga kyrmen skhem ba kane ka jingïalehkai kan long kaba itynnad bad ruh ban ïalehkmen lang bad ka kynhun,” la bynrap kat kum ka kyrwoh ba la pyllait lyngba ka All India Football Federation.
Kumba ka long mynta kane ka kynhun ka dang pynleit jingmut na ka bynta ki jingkilanmet mynta la kumba artaïew. “Ki rangïalehkai ki la pynkhreh bha. Ngi la pynkhlaiñ bha ïa ka kynhun ha baroh ki bynta,” la bynrap utei u coach.
“Ka jingpynkhreh ïa ka kynhun ka la nang ïai kiew ha ki buit ïalehkai katba nang mih ki sngi. Naduh ka Lah Sngi U Blei ngin dang ïai pynkhlaiñ ïa ka kynhun ha man la kawei pa kawei ka bynta.”
Te kumta kane ka kynhun ïalehkai ka ri kan leit sha Kolkata ha ka 2 tarik u Jylliew, hynrei kan mih lypa ban leit sha katei ka nongbah West Bengal ha ka 29 tarik mynta u bnai khnang ban pynïahap bad ka jinglong ka mariang ha katei ka jaka.
“Ka long kaba khluid bad kaba shit bha ha kane ka jaka, hynrei ngi la ïoh ban kilanmet. Baroh ki long kiba biang nadong-shadong ha kane ka jaka. Hynrei ngi la rai ban leit sha Kolkata ha kine ki khyndiat sngi ki ban wan khnang ban pynïahap bad ka jinglong ka mariang ha katei ka jaka bad ban pynkhreh ïa katei ka jingïakhun kaba kongsan,” la bynrap u Stimac.
