Shillong, Jymmang 24
3 ngut ki khynnah kiba la don ha ka jingshah pyntbit hapoh ka Super Elite Pathway Program (SEPP) ki la lah ban khur 7 tylli ki takma ha ka State Level Inter School Athletic Meet 2024 kaba la poi sha kaba kut ha ka Sngi Thohdieng ha SAI Training Centre, Shillong.
U Henry Yoga Sangma uba dang 15 snem ka rta na Resubelpara, u la khur 3 tylli ki takma ksiar ha ka jingïakop mareh kaba 100m, 200m bad ha ka Medley Relay jong ka kyrdan ïalehkai Under-18.
Kumjuh ka Kasanchi D. Marak kaba dang 14 snem ka rta na Baghmara, ka la khur 2 tylli ki takma ksiar ha ka jingïakop mareh kaba 100m bad ha ka Medley Relay lem bad ka takma rupa ha ka 300m jong ka kyrdan ïalehkai under-16.
Ka Enriyana Momin kaba dang 13 snem ka rta na Resubelpara, ka la khur kawei ka takma ksiar ha ka Medley Relay.
Halor kane ka jingjop, na ka liang u khlur ïalehkai Olympic barim na Australia u Ian Campbell u la pynpaw ka jingsngewkmen ban ïohi ïa ka jingkiew ki khynnah lyntba ka SEPP Program. Lyngba ka jinglah ban khur hynriew tylli ki takma ksiar bad kawei ka takma rupa ka pyni ïa ka jingkiew shaphrang ki khynnah.”
“Baroh kine lai ngut ki nongïalehkai ki la nangkiew shaphrang hadien ka jingshah hikai kaba la khatwei bnai hapoh ka SEPP Program. U Henry Yoga Sangma u la wan balai ha ka 100m jong ka Under-16 bad mynta ka kynti u la khur haduh 3 tylli ki takma ksiar bad ban ïoh ïa ka nam best athlete ha ka Under-18. Ka Kasanchi D Marak ka la khur 2 tylli ki takma ksiar bad kawei ka takma rupa wat la ka don hapdeng ka jingmynsaw malu-mala bad ka Enriyana Momin ka la khur ïa ka takma ksiar.”
Lyngba kine ki khatwei bnai ba ki la ïoh ka jingshah hikai hapoh ka SEPP ki la nangkiew shaphrang naduh ka bor met bor phad, ka bor pyrkhat bad ruh ha ki lympung ïalehkai.
“Ngam lah khlem da ai khublei ïa ki jingkyrshan bad ban don ka jingshaniah lyngba kane ka prokram ba ngi la lah ban sei ïa ki nongïalehkai kiba tbit. Ngi khmih lynti ba ngin danglah ban sei ïa ki nongïalehkai kiba don ïa ki sap ba kyrpang na kane ka Jylla,” u la bynrap.
