The Hague, Jymmang:
Ki nongbishar jong ka ïingbishar ba heh duh jong ka United Nations ha kane ka kynti ki la bthah ia ka Israel ba ka dei ban sangeh noh shi syndon ia ka jingleit hiar thma sha Gaza khlem da pynslem khamtam ha ka nongbah Rafah jong ka Gaza Strip. Namar la ong ba katei ka ïingbishar jong ka UN ka la ong ba ka jingleit hiar thma jong ka Israel sha Gaza ha kane ka sien, kam long shuh tang ka kput hynrei ka dei ka jingkwah ban pynjot bad pyn-um ia ka nongbah Gaza baroh kawei bad ban ioh knieh noh syndon ia ka bor synshar ha katei ka nongbah.
Haba pule ia katei ka jingbthah na ka International Court ha katei ka sngi, u Nawaf Salam u la ong ba ka jinglong jingman hapoh Palestine kam long shuh ban dang pynslem bad ban ailad ia ka Israel ba kan bteng shuh shuh ia ka thma ha katei ka nongbah. Namarkata la ong ba katei ka ïingbishar ba hakhlieh duh jong ka pyrthei, ka la bthah ia ka Israel ba ka dei ban sangeh noh shi syndon ia ka thma hapoh Gaza lada ka kwah ban lait na ki jingeh bad ki jingma kiba ap kylla ia ka Israel haba kam kohnguh ia ka jingbthah bad ka jingkyntu jong ki tnat ka pyrthei.
Ha kajuh ka por, ka ïingbishar ka la bthah ia ka Israel ba kan plie noh ruh ia u khappud na ka nongbah Rafah ban iaid lyngba na Egypt sha Gaza na ka bynta ki jingdonkam bad ki lad jingiarap ban pynpoi da ka UN sha ki paidbah nongshong shnong ka Gaza.
