Shillong, Jymmang 26
U Kylian Mbappe u la pynkut noh ïa ka jingim ïalehkai phutbol na ka Paris St-Germain (PSG) da kaba ïoh rah ïa ka nam lahduh jong ka lympung French Cup hadien ka jingjop ïa ka Lyon ha ka final bad pynlong ruh ïa kane ka kynhun u Luis Enrique ban rah baroh ar tylli ki nam lahduh ba heh ha France.
Ha kane ka jingïalehkai final, ka PSG ka la lah ban pynliem noh ïa ka Lyon da 2-1 kol bad ïa ki kol ka PSG la ïoh ban thep da u Ousmane Dembele bad u Fabian Ruiz u la thep ïa ka kol kaba ar, katba ïa ka shi kol jong ka Lyon pat la thep da u Jake O’Brien.
U rangïalehkai shakhmat ka France u Mbappe, 25 snem ka rta, un mih noh na ka PSG hadien ba u la dep ban thep haduh 256 tylli ki kol na ki 308 tylli ki jingïalehkai, kata naduh ba u la pynïasoh sha ka PSG na ka Monaco ha u snem 2017.
La khmih lynti ba hadien kane, mynta u Mbappe un sa leit ban pynïasoh noh ïa lade bad ka Real Madrid; ka klob kaba la kwah hir hir ban wanrah ïa une u rangïalehkai kaba la ïakren bad wad lad ruh mynta la phra snem kynthih.
Ha ki hynñiew tylli ki snem ba u la don hapoh ka PSG, u Mbappe u la jop haduh hynriew tylli ki nam lahduh ka Ligue 1 bad saw tylli ki nam lahduh ha ka French Cups bad ar tylli ki League Cup.
Wat la u Mbappe na ki hynñiew tylli ki jingïalehkai kiba la dep u la shah pynmih bujli khlem shah kynthup shuh ha ka thup jong 11 ngut, hynrei ha ka final jong ka French Cup pat u la ïoh ban mih naduh kaba sdang. Kane ka jingbym pynmih shuh ïa u Mbappe ha ki jingïalehkai kiba la dep, ki long ka jingpyrshang jong u Luis Enrique kumno ban pynwandur ïa ka kynhun khlem ma u.
