New Delhi, Jymmang:
Ka tnat shipai Israel Defense Forces (IDF) ha kane ka por ka la pyntip ba ka la lap ia ka met iap jong 3 ngut kiba shah rahbor ha ka Hamas napoh ka nongbah Gaza hapdeng ka jingleit hiar thma bad jingleit khynra sha ki bynta jong ka nongbah Gaza. Kitei 3 ngut ki kynthup ia u Hanan Yablonka, Michel Nisenbaum bad u Orion Hernandez kiba la shah rahbor bad shah pyniap dusmon ha ki lehnoh Hamas naduh ka 7 tarik ba ki la shah kit na Israel shaduh sha Gaza.
Kumta, ki shipai ka Israel ha katei ka sngi ki la pyntip ba kitei 3 ngut ki la dep khlad naduh katei ka por ba ki Hamas ki rahbor ia ki sha Gaza hynrei ki shu buhrieh bad thok ba kitei kiba shah rahbor baroh ki don ha ka kti jong ki. Pynban, ka jingshisha ka lah ban nang kham long kaba sniew bok ioh kin don sa tang katto-katne ngut ki ban dang im bad sah tad haduh kane ka kynti bad kiba dang don shisha bad ki lehnoh Hamas.
Shuh shuh la ong ba ia ka met jong kitei 3 ngut ruh la ioh ban kurup noh da ki shipai ka Israel bad ka Israeli Security Agency kiba leit ban khynra sha ki jaka bad ki ktem lehnoh Hamas hapoh In Jabaliya, kaba long ka nongbah jong ka Gaza Strip.
Kumta, ki bahaiing jong kitei kiba khlad baroh ki la kyrpad ia ki bor pyniaid ka Israel ba kin pynpoi noh ia ka met jong kitei khun- ki kti jongki sha iing khnang ba kin ioh ban leh burom khatduh bad ban pyndep ia ka met kaba sah jongki wat hadien bun bnai ba ki la shu sahkut ha katei ka nongbah Gaza khlem da ioh jingtip ne ioh ban wanrah noh ia ki sha iing ha ka por kaba biang.
Kumta, la ong ba ka jingwan poi ka met jong u Michel, Hanan bad Orion ha kane ka sien, ka long ruh ka jing- jaw ummat kthang bad ka jingpait dohnud ia ki 125 tylli ki longiing jong kito kiba shah rahbor ha kitei ki lehnoh Hamas namar ki hap ban mad ia kajuh ka jingsngew bad kajuh ka jingduh kumba long kitei ki bahaiing jong kine ki 3 ngut ha kane ka por.
Watla ka jinglap ia kitei ki metiap ka long ka bym poi pyrkhat bad ka bym paw pyrthei, hynrei ka State of Israel kan pyrshang katba lah ban ioh ban pynpoi noh ia ka met jong kitei ki 3 ngut sha ki bahaiing- bahasem jongki ha ka por kaba kloi bad ban ioh ban leh burom khatduh da ki baieid- bathoiñ jongki.
La ong ba kitei ki 121 ngut kiba la dep shah rahbor ha ki lehnoh Hamas naduh ka 7 tarik u Risaw, la ngeit ba ki don beit hapoh ka nongbah Gaza hi baroh bad 37 ngut ki dei kiba la dep pyntikna da ki lehnoh Hamas ba ki la dep khlad bad kumjuh ruh kiba la dep ban pyntikna katkum ka jinglap jong ki shipai ka Israel tad haduh kane ka kynti.
Kumjuh ruh la ong ba ka jingleit hiar thma bad jingleit kput jong ka Israel pyrshah ia ki lehnoh Hamas hapoh ka nongbah Gaza, ka la wanrah ia ka jingïap jong palat 35 hajar tam ki mynsiem briew kiba long ki paid nongshong shnong ba lui-lui jong ka nongbah Gaza.
