Dhaka, Jymmang:
Ka ïingbishar jong ka Bangladesh ha ka Sngi Thohdieng ka la aiti ia 8 ngut ki suba don kti ha ka jing- thombor pyrshah ia u nongialam ka Awami Legaue- u Anwarul Azim Anar ha ka por ba u don ha India.
U Anar u long u nongialam uba la bat ia ka shuki Myntri jong ka iing dorbar thaw aiñ haduh lai sien na Jhenaidah-4 hapoh Bangladesh bad kumjuh u President jong ka Awami League napoh ka distrik Kaliganj distrik. La ong ba utei u nongialam u la wan sha ka nongbah Kolkata jong ka West Bengal ha ka 12 tarik u Jymmang na ka bynta ban sumar hynrei u la jah noh na Kolkata ha ka 13 tarik jong ujuh bnai.
Katkum ka khubor na ki pulit ka Kolkata, la ong ba ki la ioh lum ia ki sabut ba utei u MP u la shah bat bad shah pyniap katba u dang don ha lynti bad ia ka met jong u la mait lyng-khot-lyngkhai bad hadien kata la leit ban bret saphriang sha kylleng ki jaka bad ia ki dkhot met jong utei u nongialam ym pat lah ban shem namar ki la poi sakma.
Ki pulit ka Bangladesh ha kane ka por pat ki la ioh kem ia kitei 8 ngut kiba la suba ba kin dei kiba don kti ha katei ka jingjia bad ha ka Sngi Thohdieng ki pulit ki la pynpaw kyrteng ia kitei ki suba don kti kiba kynthup ia u Tanvir, Shimul Bhuiyan bad Silisti Rahman hakhmat ka Dhaka Metropolitan Magistrate Dilruba Afroz Tith bad ban ai lad ruh ia ki pulit tang 10 sngi ba kin ioh ban tohkit bniah ia kitei ki suba don kti baroh bad ban lap ruh ia ka daw tynrai halor ka jingpynïap ia utei u nong-ialam.
Hadien ba la pynsngap ia katei ka mat ba iadei bad ka jingleh pynkheiñ aiñ bad ka jingiadon kti jong kitei ki 8 ngut ha katei ka jingjia, ka ïingbishar ka la aiti ia kitei 8 ngut hapoh ka kti jingtohkit jong ki pulit hapoh 10 sngi shuwa ba kan pynsngap bad shim rai biang halor ki kyndon ba kitei 8 ngut ki dei ban shah pynngat lada la lah ban pyntikna ia ka jingdon kti jong ki ha katei ka kam pyniap briew.
La ong ba ia katei ka kam, la dep thmu bad suh buit lypa naduh kumba lai bnai ha shwa ba katei ka jingjia kan urlong katkum ba la pynbeit da kitei ki kynhun runar.
Kumta, ka kynhun CID jong ka West Bengal ha ka Sngi Palei ka la leit sha Bangladesh na ka bynta ban ioh tohkit bniah ia lai ngut napdeng kitei kiba shah kem bad ban lap ruh ia ka daw jong ka jingleh jong ki ia katei ka kam runar khamtam haba utei u nongialam u wan sha India khlem da poi pyrkhat ba ka jingwan jong u kan wanrah jingma ia ka jingim jong u haduh ba un hap ban da duh noh syndon ia ka jingim jong u khlem da don kano-kano ka daw ka ban pynlong artatien ia u ba un wan sha India.
