Washington, Jylliew:
Ka White House ha ka miet Sngi Palei, ka la pyntip ba u Vice President JD Vance un pynsangeh noh shuwa ïa ka jingleit jurip jong u sha Switzerland, naka bynta ka jingiakren bad ka Iran haba iadei bad ki kam ‘Nuclear’ bad kaba la wanrah ïa ka jingkylli na kiba bun, haba iadei bad ka jingiateh soskular naka bynta ka jingsangeh thma ba pura ha Middle East.
Ka kynhun ba hapoh ka jingïalam jong u Vance ka la long kaba la khreh ban mih hynrei ka la pynjlan por noh ïa katei ka jingleit, la ong ka White House da kaba kdew ïa ki jingeh ha ka jingpynpoi marbam na ka bynta ka jingïakren. Kane ka jingpynbna ka long hadien ka khubor na ka Al-Mayadeen, ka pan-Arab satellite channel kaba ïatreilang ha ka saiñpyrthei bad ka kynhun lehnoh Hezbollah na Lebanon ba la kyrshan da ka Iran, ba ka Iran ka pynslem ban phah ïa ka kynhun shipai jongka sha Switzerland halor ka jingïaid lynti jong ka Israel ha Lebanon.
U Vance, uba ha kaba sdang u la sngew artatien shimet ïa ka jingleit thma jong ka U.S. bad ka Iran, u la nang kylla long ka khmat jong ka sorkar ha ka jingialeh bad u la kren shai ha kaba iada ïa katei ka jingiateh.
Ha katei hi ka Sngi Palei, u la shim ïa ka sienjam kaba pher bha ban mih ha White House ban ïada ïa ka jingïateh ba nyngkong ban pynjlan ïa ka jingsangeh thma da 60 sngi bad ban ailad ban ïakren shuh shuh – da kaba kynthoh ba katba ka ai jingbit, ka Iran ka hap ban kohnguh nyngkong ïa ki jingdawa jong ka U.S.
“Ynda haba ki pynpaw ïa ka mynsiem ba bha jongki, ngi ruh ngin pynim ïa ka ioh- ka kot jongki, lada ki pyni ïa ka jinglong ba bha jongki, ngi ruh ngi lah ban pynkut noh ïa kine baroh,” la ong u Vance.
Hynrei une u Vice President ruh u la ong ha kito ki jingkren ba um tikna ïa ka por jong ka jingthmu jong u ban leit sha Switzerland bad ba ka jingiakren ka lah ban nym long shuh ha kane ka taiew.
Ka jingsah jong u Vance ha Washington ka la jia hadien ba ka U.S. ka la ong ba ka la weng noh ïa ki jingpyrkhing jongka, kaba la ailad ïa ki jhad kit umphniang ban sdang ïaid laitluid biang lyngba ïa ka lynti ïaid jhad na ka duriaw Strait of Hormuz hadien bun bnai ba kim lah shuh ban pyndonkam ïa ka lynti kaba kongsan. Watla katta ruh, katei ka jingïateh kular kaba dang shu sdang, ka la ïoh ïa ka jingkynthoh kaba jur na ki katto katne ha U.S. – kynthup ïa ki katto katne ngut ki Republican kiba don ha ka dorbar thawaiñ – kiba sngewkhia ba ka Washington ka la aiti palat sha ka Iran da ka jingpyllait na ki jingpynjari bad ka jingmang pisa kaba lah ban long $300 billion ban ïarap ban tei pat.
Kham mynshwa, uwei u nongmihkhmat ba ha khlieh duh jong ka sorkar Trump u la ong ha ki nongthaw aiñ jong ka U.S. ha ka jingïakren shimet ba ka Iran kan khot ïa ka tnat peitngor jong ka U.N.
Bad u nongialam ba ha khlieh duh jong ka Iran, u Ayatollah Mojtaba Khamenei, u la i kumba u kyrshan ïa ka jingiakren beit beit na ka bynta ki heh jong u.
“Ka paw shai ba ka jingiakren markhmat ka ban sa long ha ki por ban wan kan nym mut ban pdiang ïa ka jingmut jong u nongshun,” la ong u Myntri Rangbah ha ka kyrwoh ba la pule da ki lad pathai khubor jong ka sorkar jylla.
Ka dei ka jingkynthoh kaba nyngkong eh jong u Khamenei halor katei ka jingiateh, bad la batai ïa ka kum ka jingkylla ha ka rukom treikam jong ka Iran. Ki riew pyrshah, khamtam u kpa jong u Khamenei, uba dei u nongïalam ba hakhmat duh mynshwa, ki la pyrshah slem ïa ki jingïakren ba beit, khamtam hadien ba ka U.S. ka la weng noh ïalade na ka jingïateh kular nuclear ha u snem 2015 hapdeng ka Iran bad ki ri ba khlaiñ bor ha ka pyrthei.
Ia u nongialam ba ha khlieh duh ym shym la iohi paidbah naduh ba u la mynsaw ha ka jingiakhih ha kaba sdang jong ka thma.
Ka jingiateh ka ong ba ïa ka jingbuh jingkynmaw jong ka Iran ïa u uranium uba la pynriewspah bha, la kumno kumno dei ban pynduna hapoh ka jingpeit jong ki ri ka pyrthei. Ka ong ruh ba ka Iran kan nym thied ne pynmih ïa ki tiar nuclear – ka jingkular kaba ka la ai mynshwa.
U nongmihkhmat jong u Trump, u Steve Witkoff, u iathuh ha ki dkhot jong ka Congress, ba ka Iran, kan khot ïa ka International Atomic Energy Agency, ban leit jurip ïa ki jaka shna nuclear jongka bad kan sdang ïa ka jingtrei, na ka bynta ban ithuh bad sei ïa ki jaka jong ki tiar ba la pynriewspah jong ka Tehran, ha kaba la ngeit ba la tep hapoh ki thliew.
Ïa ka jingïakren shimet jong u Witkoff la batai da arngut ki briew kiba tip bha ïa kane ka jingïakren kiba la ïakren bad ka The Associated Press khlem da kwah ban pynpaw kyrteng ban ïasam ïa ki jingtip ba la khang khyrdep.
Kane ka jingïateh kular ka dawa ïa ka Iran ba kan “kular ban iehnoh ïa ki jingthmu nuclear jong ka da ka jingthoh” ong ka nongaiktien jong ka White House, ka Olivia Wales. Ka IAEA kam shym la jubab ïa ka jingkylli ban ioh jingtip.
